ಭುಬನೇಶ್ವರ್: ಒಡಿಶಾದ ಪುರಿ ನಗರದಲ್ಲಿ ವ್ಯಕ್ತಿಯೊಬ್ಬರು ಮಗಳ ಶವವನ್ನು ಸೈಕಲ್ ಟ್ರಾಲಿಯಲ್ಲಿ ಹೊತ್ತು ಸಾಗಿಸಿದ ಘಟನೆ ನಡೆದಿದೆ.
ಶನಿವಾರ ರಾತ್ರಿ ದೀನಾ ಸಾಹು ಎಂಬ ವ್ಯಕ್ತಿ ಇಲ್ಲಿನ ಜಿಲ್ಲಾ ಸರ್ಕಾರಿ ಆಸ್ಪತ್ರೆಯಿಂದ ತನ್ನ ಮಗಳು ಕಬೀ ಸಾಹು ಮೃತದೇಹವನ್ನು ಸೈಕಲ್ ಟ್ರಾಲಿಯಲ್ಲಿ ಸಾಗಿಸಿದ್ದಾರೆ.
ಕಬೀ ಸಾಹು ಅವರಿಗೆ ತೀವ್ರ ಎದೆ ನೋವು ಕಾಣಿಸಿಕೊಂಡ ಕಾರಣ ಅಪ್ಪ ದೀನಾ ಸಾಹು ಆಸ್ಪತ್ರೆಗೆ ಕರೆದುಕೊಂಡು ಬಂದಿದ್ದರು. ಆಸ್ಪತ್ರೆಗೆ ತಲುಪುವ ಹೊತ್ತಿಗೆ ಕಬೀ ಮರಣವನ್ನಪ್ಪಿದ್ದಾಳೆ ಎಂದು ಅಲ್ಲಿನ ವೈದ್ಯರು ಹೇಳಿದ್ದಾರೆ.
ಮಗಳ ಮೃತ ಶರೀರವನ್ನು ಸಾಗಿಸಲು ಆಂಬುಲೆನ್ಸ್ ಅಥವಾ ಶ್ರದ್ದಾಂಜಲಿ ವಾಹನ ಸಿಗದೇ ಇದ್ದಾಗ ಸಾಹು ಅವರು ಸೈಕಲ್ ಟ್ರಾಲಿಯಲ್ಲಿ ಮಗಳ ಮೃತದೇಹವನ್ನಿರಿಸಿ ಸ್ಮಶಾನಕ್ಕೆ ಒಯ್ದಿದ್ದಾರೆ.
ಮಗಳ ಮೃತದೇಹವನ್ನು ಒಯ್ಯಲು ಶ್ರದ್ಧಾಂಜಲಿ ವಾಹನವನ್ನು ಕರೆದರೂ ಬರಲಿಲ್ಲ. ಹಾಗಾಗಿ ಸೈಕಲ್ ಟ್ರಾಲಿಯಲ್ಲೇ ಹೊತ್ತು ಕೊಂಡು ಬಂದೆ. ಅಲ್ಲಿದ್ದ ಯಾರೊಬ್ಬರೂ ನನ್ನ ಸಹಾಯಕ್ಕೆ ಬಂದಿಲ್ಲ ಎಂದು ಸಾಹು ದೂರಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.