ಉರುಳಿದ ಅನಿಲ ಟ್ಯಾಂಕರ್‌: ಜನರ ಸ್ಥಳಾಂತರ

ಪಣಜಿ: ಅಮೋನಿಯಾ ಅನಿಲ ತುಂಬಿದ್ದ ಟ್ಯಾಂಕರ್‌ ಒಂದು ವಾಸ್ಕೊ ನಗರ– ಪಣಜಿ ಹೆದ್ದಾರಿಯಲ್ಲಿ ಶುಕ್ರವಾರ ಮಧ್ಯರಾತ್ರಿ ಉರುಳಿಬಿದ್ದು ಅನಿಲ ಸೋರಿಕೆ ಆಗಲಾರಂಭಿಸಿದ್ದರಿಂದ, ಸಮೀಪದ ಚಿಕಲಿಮ್‌ ಎಂಬ ಗ್ರಾಮದ ಎಲ್ಲ ನಿವಾಸಿಗಳನ್ನು ಸ್ಥಳಾಂತರಿಸಲಾಗಿದೆ.

‘ಗ್ರಾಮದಲ್ಲಿ ಸುಮಾರು 300 ಮನೆಗಳಿವೆ. ಅನಿಲ ಸೋರಿಕೆ ಆಗ ತೊಡಗಿದ್ದರಿಂದ ಜನ ತೀವ್ರ ಆತಂಕಕ್ಕೆ ಒಳಗಾಗಿದ್ದರು. ಹಾಗಾಗಿ, ಅಪಾಯ ತಡೆಗಟ್ಟಲು ಮುನ್ನೆಚ್ಚರಿಕೆ ಕ್ರಮವಾಗಿ ಕೂಡಲೇ ಅವರನ್ನು ಸ್ಥಳಾಂತರಿಸಬೇಕು ಎಂದು ಪೊಲೀಸ್‌, ಅಗ್ನಿಶಾಮಕ ಹಾಗೂ ತುರ್ತುಸೇವಾ ಇಲಾಖೆಗಳಿಗೆ ನಿರ್ದೇಶನ ನೀಡಿದ್ದೆವು’ ಎಂದು ಉಪವಿಭಾಗಾಧಿಕಾರಿ ಮಹಾದೇವ್‌ ಅರೊಂಡೆಕರ್‌ ಹೇಳಿದ್ದಾರೆ.

ಹೆದ್ದಾರಿಯ ಮೇಲಿನ ವಾಹನ ಸಂಚಾರವನ್ನೂ ಕೆಲಕಾಲ ಸ್ಥಗಿತಗೊಳಿಸಲಾಗಿತ್ತು.