ಆಂಧ್ರ: ಖಾಸಗಿ ಉದ್ಯಮಗಳಲ್ಲಿ ಸ್ಥಳೀಯರಿಗೆ ಶೇ 75 ಮೀಸಲಾತಿ

ಅಮರಾವತಿ: ಖಾಸಗಿ ಉದ್ಯಮಗಳಲ್ಲಿ ಶೇಕಡ 75ರಷ್ಟು ಉದ್ಯೋಗವನ್ನು ಸ್ಥಳೀಯರಿಗೆ ಮೀಸಲಿಡುವ ಮಸೂದೆಗೆಆಂಧ್ರಪ್ರದೇಶ ವಿಧಾನಸಭೆ ಅನುಮೋದನೆ ನೀಡಿದೆ.

ಎಲ್ಲ ಉದ್ಯಮಗಳು, ಕಾರ್ಖಾನೆಗಳು, ಸರ್ಕಾರಿ ಮತ್ತು ಖಾಸಗಿ ಸಹಭಾಗಿತ್ವದ ಯೋಜನೆಗಳಲ್ಲಿ ಸ್ಥಳೀಯರಿಗೆ ಈ ಮೀಸಲಾತಿ ಅನ್ವಯಿಸಲಿದೆ. ಇಂತಹ ಕಾಯ್ದೆಯನ್ನು ದೇಶದಲ್ಲೇ ಮೊದಲ ಬಾರಿಗೆ ರೂಪಿಸಿದ ರಾಜ್ಯ ಆಂಧ್ರಪ್ರದೇಶವಾಗಿದೆ.

ಈ ಸಂಬಂಧ ರೂಪಿಸಿರುವ ’ಉದ್ಯಮಗಳು ಮತ್ತು ಕಾರ್ಖಾನೆಗಳಲ್ಲಿ ಸ್ಥಳೀಯರಿಗೆ ಉದ್ಯೋಗ ಕಾಯ್ದೆ– 2019’ಕ್ಕೆ ವಿಧಾನಸಭೆ ಅನುಮೋದನೆ ನೀಡಿದೆ.ರಾಜ್ಯದಲ್ಲಿ ಈಗಿರುವ ಉದ್ಯಮಗಳಿಗೆ ಮಾತ್ರವಲ್ಲದೇ ಈ ಕಾಯ್ದೆ ಜಾರಿಯಾದ ಬಳಿಕ ಸ್ಥಾಪನೆಯಾಗುವ ಘಟಕಗಳಿಗೂ ಅನ್ವಯವಾಗಲಿದೆ.

ಕಾಯ್ದೆಯ ಪ್ರಮುಖ ಅಂಶ: ಒಂದು ವೇಳೆ ಕೌಶಲ ಹೊಂದಿದ ಸ್ಥಳೀಯರು ಲಭ್ಯವಾಗದಿದ್ದರೆ ಸರ್ಕಾರದ ಸಹಭಾಗಿತ್ವದಲ್ಲಿ ಉದ್ಯಮಗಳು ತರಬೇತಿ ನೀಡಿ ಉದ್ಯೋಗ ಕಲ್ಪಿಸಬೇಕು.ಅಲ್ಲದೆ ಕಂಪನಿಗಳು ಕಾಯ್ದೆಯನ್ನು ಪಾಲಿಸಿರುವ ಬಗ್ಗೆ ತ್ರೈಮಾಸಿಕ ವರದಿ ನೀಡಬೇಕು.ಉದ್ಯಮಗಳ ಅಗತ್ಯಕ್ಕೆ ತಕ್ಕಂತೆ ಸ್ಥಳೀಯ ಯುವಕರನ್ನು ಸಜ್ಜುಗೊಳಿಸಲು ತರಬೇತಿ ಕೇಂದ್ರಗಳನ್ನು ಸರ್ಕಾರ ಆರಂಭಿಸಲಿದೆ ಎಂದು ಕಾಯ್ದೆಯಲ್ಲಿ ಉಲ್ಲೇಖಿಸಲಾಗಿದೆ.

**

ಇಂತಹ ಕಾಯ್ದೆ ಅಗತ್ಯವಾಗಿತ್ತು. ಆಂಧ್ರಪ್ರದೇಶದಲ್ಲಿ ನಿರುದ್ಯೋಗ ತಾಂಡವವಾಡುತ್ತಿರುವ ಸನ್ನಿವೇಶದಲ್ಲಿ ಸಾವಿರಾರು ಯುವಕರ ಬದುಕಿಗೆ ಅನುಕೂಲವಾಗಲಿದೆ
- ಎಪಿಕೆ ರೆಡ್ಡಿ,ಎಫ್‌ಎಸ್‌ಎಂಇ ರಾಷ್ಟ್ರೀಯ ಅಧ್ಯಕ್ಷ

**

ಕಾಯ್ದೆಯ ಪ್ರಮುಖ ಅಂಶಗಳು

* ಒಂದು ವೇಳೆ ಕೌಶಲ ಹೊಂದಿದ ಸ್ಥಳೀಯರು ಲಭ್ಯವಾಗದಿದ್ದರೆ ಸರ್ಕಾರದ ಸಹಭಾಗಿತ್ವದಲ್ಲಿ ಉದ್ಯಮಗಳು ತರಬೇತಿ ನೀಡಿ ಉದ್ಯೋಗ ಕಲ್ಪಿಸಬೇಕು.

* ಕಂಪನಿಗಳು ಕಾಯ್ದೆಯನ್ನು ಪಾಲಿಸಿರುವ ಬಗ್ಗೆ ತ್ರೈಮಾಸಿಕ ವರದಿ ನೀಡಬೇಕು.

* ಉದ್ಯಮಗಳ ಅಗತ್ಯಕ್ಕೆ ತಕ್ಕಂತೆ ಸ್ಥಳೀಯ ಯುವಕರನ್ನು ಸಜ್ಜುಗೊಳಿಸಲು ತರಬೇತಿ ಕೇಂದ್ರಗಳನ್ನು ರಾಜ್ಯ ಸರ್ಕಾರ ಆರಂಭಿಸಲಿದೆ.