ತರಗತಿಗೆ ಗೈರು,ಕೋರ್ಸ್‌ ಕೈಬಿಟ್ಟರೆ ವಿದ್ಯಾರ್ಥಿ ವೀಸಾ ರದ್ದು: US ರಾಯಭಾರಿ ಕಚೇರಿ

ನವದೆಹಲಿ: ‘ತರಗತಿಗಳಿಗೆ ಗೈರುಹಾಜರಾದರೆ, ಕೋರ್ಸ್‌ ಅನ್ನು ಅರ್ಧದಲ್ಲಿಯೇ ನಿಲ್ಲಿಸಿದರೆ ಅಥವಾ ಕೋರ್ಸ್‌ನಿಂದ ಹೊರಗುಳಿದರೆ ವಿದ್ಯಾರ್ಥಿ ವೀಸಾ ಹಿಂಪಡೆಯಲಾಗುತ್ತದೆ’ ಎಂದು ಭಾರತದಲ್ಲಿನ ಅಮೆರಿಕ ರಾಯಭಾರಿ ಕಚೇರಿಯು ಮಂಗಳವಾರ ವಿದೇಶಿ ವಿದ್ಯಾರ್ಥಿಗಳಿಗೆ ಎಚ್ಚರಿಸಿದೆ. 

ಈ ಕುರಿತು ‘ಎಕ್ಸ್‌’ನಲ್ಲಿ ಮಾಹಿತಿ ಹಂಚಿಕೊಂಡಿರುವ ರಾಯಭಾರ ಕಚೇರಿಯು ಯಾವುದೇ ಸಮಸ್ಯೆ ಆಗದಂತೆ ಕೋರ್ಸ್‌ ಪೂರ್ಣಗೊಳಿಸಬೇಕು ಎಂದು ಸಲಹೆ ಮಾಡಿದೆ.  

ಅಮೆರಿಕದ ವಿವಿಧ ವಿಶ್ವವಿದ್ಯಾಲಯಗಳಲ್ಲಿ ದೊಡ್ಡ ಸಂಖ್ಯೆಯಲ್ಲಿ ಭಾರತದ ವಿದ್ಯಾರ್ಥಿಗಳು ನೋಂದಣಿ ಮಾಡಿಕೊಳ್ಳುತ್ತಾರೆ. 2023ರಲ್ಲಿ 1.40 ಲಕ್ಷ ಭಾರತದ ವಿದ್ಯಾರ್ಥಿಗಳಿಗೆ ಅಮೆರಿಕ ಕಾನ್ಸುಲೇಟ್‌ ವೀಸಾ ನೀಡಿತ್ತು. ಸತತ ಮೂರನೇ ವರ್ಷ ದಾಖಲೆ ಸಂಖ್ಯೆಯಲ್ಲಿ ವೀಸಾ ನೀಡಿದ್ದ ಹಿರಿಮೆಗೆ ಪಾತ್ರವಾಗಿತ್ತು.