ಸಂವಿಧಾನದ ತಿದ್ದುಪಡಿ ಹೇಗೆ?

ಸಂವಿಧಾನವು ಆರಂಭವಾದಾಗಿನಿಂದ ಇಲ್ಲಿಯವರೆಗೆ 101 ಬಾರಿ ತಿದ್ದುಪಡಿ ಮಾಡಲಾಗಿದೆ. ಆರಂಭದಲ್ಲಿದ್ದ 395 ವಿಧಿ (ಆರ್ಟಿಕಲ್‌) ಈಗ 448ಕ್ಕೆ ಏರಿದೆ. ಅದೇ ರೀತಿ 22ವಿಭಾಗಗಳು 25ಕ್ಕೆ ಏರಿದ್ದು, ಮೊದಲಿದ್ದ ಎಂಟು ಶೆಡ್ಯೂಲ್‌ಗಳು 12ಕ್ಕೆ ಏರಿವೆ. 

ತಿದ್ದುಪಡಿಯನ್ನು ಹೇಗೆ ಮಾಡಬೇಕು ಎಂಬ ಬಗ್ಗೆ 368ನೇ ವಿಧಿಯಲ್ಲಿ ಸೂಚಿಸಲಾಗಿದೆ. ತಿದ್ದುಪಡಿಗೂ ಮುನ್ನ ಮಸೂದೆಯನ್ನು  ಸಂಸತ್ತಿನ ಯಾವುದಾದರೊಂದು ಸದನದಲ್ಲಿ ಮಂಡಿಸಬೇಕು. ಆ ಸದನದ ಒಟ್ಟು ಸದಸ್ಯರ ಬಹುಮತದಿಂದ ಮತ್ತು ಆ ಸದನದ ಸದಸ್ಯರ ಪೈಕಿ ಹಾಜರು ಇರುವ ಸದಸ್ಯರ ಮೂರನೆಯ ಎರಡು ಭಾಗಕ್ಕೆ ಕಡಿಮೆಯಿಲ್ಲದಂತೆ ಮತ ಬರಬೇಕು.

ನಂತರ ಅದನ್ನು ರಾಷ್ಟ್ರಪತಿಯವರ ಅನುಮತಿಗೆ ಕಳುಹಿಸಬೇಕು. ಆದರೆ, ರಾಷ್ಟ್ರಪತಿಗಳ ಚುನಾವಣೆಗೆ ಸಂಬಂಧಿಸಿದ (54, 55ನೇ ವಿಧಿ), ಕಾರ್ಯಾಂಗ ಅಧಿಕಾರ ವ್ಯಾಪ್ತಿ (73, 162ನೇ ವಿಧಿ), ಹೈಕೋರ್ಟ್‌ಗೆ ಸಂಬಂಧಿಸಿದ ವಿಷಯಗಳು (241ನೇ ವಿಧಿ) ಸೇರಿದಂತೆ ಕೆಲವೊಂದು ವಿಧಿಗಳಲ್ಲಿ ತಿದ್ದುಪಡಿ ಮಾಡುವುದಿದ್ದರೆ ಮಸೂದೆಯನ್ನು ಅನುಮತಿಗಾಗಿ ರಾಷ್ಟ್ರಪತಿಯವರಿಗೆ ಒಪ್ಪಿಸುವುದಕ್ಕೆ ಮುಂಚೆ ಒಟ್ಟೂ ರಾಜ್ಯಗಳ ಅರ್ಧಕ್ಕಿಂತ ಅಧಿಕ ರಾಜ್ಯಗಳ ವಿಧಾನಮಂಡಲ, ಅದನ್ನು ಅಂಗೀಕರಿಸಿ ನಿರ್ಣಯ ಮಂಡಿಸಬೇಕು.