ಸಿ.ಎಂ. ಮನೆಯಲ್ಲಿ ಹೋಮ

ಬೆಂಗಳೂರು: ಮುಖ್ಯಮಂತ್ರಿ ಬಿ.ಎಸ್‌.ಯಡಿಯೂರಪ್ಪ ಅವರ ಇಲ್ಲಿನ ‘ಧವಳಗಿರಿ’ ಮನೆಯಲ್ಲಿ ಭಾನುವಾರ ಬೆಳಿಗ್ಗೆ ಸುದರ್ಶನ ಹೋಮ ಮತ್ತು ನರಸಿಂಹ ಹೋಮ ನಡೆಯಿತು.

ವಿಧಾನಸಭೆ ಉಪಚುನಾವಣೆಯಲ್ಲಿ ಗರಿಷ್ಠ ಸ್ಥಾನ ಗೆದ್ದರೆ, ಆ ಮೂಲಕ ಸರ್ಕಾರ ಸ್ಥಿರಗೊಂಡರೆ ಮನೆಯಲ್ಲೇ ಈ ಎರಡು ಹೋಮಗಳನ್ನು ನಡೆಸುವ ಹರಕೆಯನ್ನು ಯಡಿಯೂರಪ್ಪ ಹೊತ್ತಿದ್ದರು ಎಂದು ಹೇಳಲಾಗಿದೆ. ಹೀಗಾಗಿ ಪುತ್ರ ಬಿ.ವೈ.ವಿಜಯೇಂದ್ರ ದಂಪತಿ ಸಹಿತ ಈ ಹೋಮ ನಡೆಸಿದರು.ಕುಟುಂಬದ ಪುರೋಹಿತರ ಹೊರತಾಗಿ ಮನೆಯಲ್ಲಿ ಬೇರೆ ಯಾರೂ ಇರಲಿಲ್ಲ. ಸುಮಾರು ಮೂರು ಗಂಟೆ ಕಾಲ ಈ ಧಾರ್ಮಿಕ ವಿಧಿ ವಿಧಾನಗಳು ನಡೆದವು.

ಅತ್ಯಂತ ಖಾಸಗಿಯಾಗಿ ನಡೆದ ಈ ಹೋಮದಿಂದ ಆಪ್ತ ಸಚಿವರು, ಶಾಸಕರು, ಕಾರ್ಯದರ್ಶಿಗಳನ್ನುಸಹ ದೂರ ಇಡಲಾಗಿತ್ತು. ಮುಖ್ಯವಾಗಿ ಕೆ.ಆರ್‌.ಪೇಟೆ ಕ್ಷೇತ್ರದಲ್ಲಿ ಬಿಜೆಪಿಗೆ ವಿಜಯ ದೊರಕಲು ಪ್ರಮುಖ ಕಾರಣವಾಗಿರುವ ಪುತ್ರ ವಿಜಯೇಂದ್ರನಿಗೆ ಎದುರಾಗಿರಬಹುದಾದ ಶತ್ರು ಕಾಟವನ್ನು ನಿವಾರಿಸುವುದು ಸಹ ಸುದರ್ಶನ ಹೋಮ ನಡೆಸಿದ್ದಕ್ಕೆ ಪ್ರಮುಖ ಕಾರಣ ಎಂದು ಹೇಳಲಾಗುತ್ತಿದೆ.