ಶಾಂತಿ ಸ್ಥಾಪನೆಗೆ ಅಣು ನಿಶ್ಶಸ್ತ್ರೀಕರಣವೇ ದಾರಿ: ದ. ಕೊರಿಯಾ

ಸೋಲ್ : ‘ಅಣು ನಿಶ್ಶಸ್ತ್ರೀಕರಣವೊಂದೇ ಕೊರಿಯಾ ಪರ್ಯಾಯ ದ್ವೀಪದಲ್ಲಿ ಶಾಂತಿ ಸ್ಥಾಪನೆಯ ಮಾರ್ಗ’ ಎಂದು ದಕ್ಷಿಣ ಕೊರಿಯಾದ ಅಧ್ಯಕ್ಷ ಮೂನ್ ಜೇ–ಇನ್ ಬುಧವಾರ ಹೇಳಿದ್ದಾರೆ.

‘ಒಲಿಂಪಿಕ್ ಕ್ರೀಡಾಕೂಟವನ್ನು ಸುಗಮವಾಗಿ ಆಯೋಜಿಸುವ ನಿಟ್ಟಿನಲ್ಲಿ, ಉತ್ತರ ಕೊರಿಯಾದ ಅಣ್ವಸ್ತ್ರ ವಿಚಾರವನ್ನು ಶಾಂತಿಯುತವಾಗಿ ಬಗೆಹರಿ
ಸುವ ನಮ್ಮ ಪ್ರಯತ್ನ ಮುಂದುವರಿಯಬೇಕು’ ಎಂದು ಅವರು ಸುದ್ದಿಗೋಷ್ಠಿಯಲ್ಲಿ ಹೇಳಿದ್ದಾರೆ.

‘ಯುದ್ಧದ ಬಗೆಗೆ ಜನರಲ್ಲಿ ಆಳವಾಗಿ ಬೇರೂರಿರುವ ಆತಂಕ ಮತ್ತು ಅಪನಂಬಿಕೆಯನ್ನು ನಾನು ಹಂತಹಂತವಾಗಿ ಅಳಿಸಿಹಾಕುತ್ತೇನೆ. ಪೂರಕ ವಾತಾವರಣ ಸೃಷ್ಟಿಯಾದರೆ ಉತ್ತರ ಕೊರಿಯಾ ನಾಯಕರನ್ನು ಭೇಟಿಯಾಗಿ ಚರ್ಚೆ ನಡೆಸುತ್ತೇನೆ’ ಎಂದು ಮೂನ್ ಹೇಳಿದ್ದಾರೆ.

ದಕ್ಷಿಣ ಕೊರಿಯಾದಲ್ಲಿ ನಡೆಯುವ ಒಲಿಂಪಿಕ್ಸ್‌ಗೆ ಕ್ರೀಡಾಪಟುಗಳನ್ನು ಕಳುಹಿಸಲು ಉತ್ತರ ಕೊರಿಯಾ ಮಂಗಳವಾರವಷ್ಟೇ ಸಮ್ಮತಿಸಿತ್ತು. 1988ರಲ್ಲಿ ನಡೆದ ಒಲಿಂಪಿಕ್ ಕ್ರೀಡಾಕೂಟವನ್ನು ಉತ್ತರ ಕೊರಿಯಾ ಬಹಿಷ್ಕರಿಸಿತ್ತು.