ಕರಣ್‌ಗೆ ಅಮ್ಮನೇ ಪಥ್ಯ ತಜ್ಞೆ!
ಕಿರುತೆರೆಯ ಜನಪ್ರಿಯ ನಾಯಕನಟ ಕರಣ್ ಸಿಂಗ್ ಗ್ರೋವರ್ ಇರಿಯುವ ಕಣ್ಣೋಟ ಮತ್ತು ಆಕರ್ಷಕ ಅಂಗಸೌಷ್ಟವದಿಂದ ಹೆಸರಾದವರು. ತಮ್ಮ ಆಕರ್ಷಕ ಅಂಗಸೌಷ್ಟವಕ್ಕೆ ನಟ ಸಲ್ಮಾನ್ ಖಾನ್ ಪ್ರೇರಣೆ ಅನ್ನುತ್ತಾರೆ ಕರಣ್. ಸಲ್ಮಾನ್ ಅವರ ದೇಹಸಿರಿಯನ್ನು ಕಣ್ತುಂಬಿಕೊಳ್ಳಲೆಂದೇ ಕರಣ್ ಸಲ್ಲೂ ಚಿತ್ರಗಳನ್ನು ನೋಡುತ್ತಾರಂತೆ.
ಡಯಟ್ ಮತ್ತು ವರ್ಕ್ಔಟ್ ಬಗ್ಗೆ ಕಟ್ಟುನಿಟ್ಟಾಗಿರುವ ಕರಣ್, ಯಾವುದೇ ಕಾರಣಕ್ಕೂ ಈ ಎರಡು ನಿಯಮಗಳನ್ನು ಮುರಿಯುವುದಿಲ್ಲವಂತೆ. ಫಿಟ್ ಅಂಡ್ ಫೈನ್ ದೇಹಕ್ಕೆ ಆರೋಗ್ಯಕರ ನಿದ್ದೆ, ಆಹಾರ ಮತ್ತು ವ್ಯಾಯಾಮ ಅತ್ಯಗತ್ಯ ಅನ್ನೋದು ಕರಣ್ ನಂಬಿಕೆ. ತಮ್ಮ ದೇಹದ ಒಟ್ಟಾರೆ ಫಿಟ್‌ನೆಸ್‌ನಲ್ಲಿ ಶೇ 35ರಷ್ಟು ವರ್ಕ್‌ಔಟ್‌ಗೆ, ಉಳಿದ ಶೇ 60 ಪಥ್ಯಾಹಾರ ಮತ್ತು ಶೇ 5ರಷ್ಟು ಇನ್ನಿತರ ಸಂಗತಿಗಳಿಗೆ ಮೀಸಲು ಇರಿಸಿದ್ದಾರೆ.
ಕರಣ್ ತಾವು ನಿತ್ಯ ಸೇವಿಸುವ ಆಹಾರವನ್ನು ನಾಲ್ಕು ಸಣ್ಣ ಸಣ್ಣ ಭಾಗಗಳನ್ನಾಗಿ ವಿಂಗಡಿಸಿಕೊಂಡಿದ್ದಾರೆ. ಅದರಲ್ಲಿ ಶೇ 5ರಷ್ಟನ್ನು ಕಾರ್ಬೋಹೈಡ್ರೇಟ್ಸ್‌, ಶೇ 15ರಷ್ಟು ಪ್ರೋಟೀನ್, ಶೇ 10ರಷ್ಟನ್ನು ವಿಟಮಿನ್‌ಯುಕ್ತ ಆಹಾರಕ್ಕೆ ಮೀಸಲಿರಿಸಿದ್ದಾರೆ. ಕರಣ್ ಹೋಟೆಲ್ ಮ್ಯಾನೇಜ್‌ಮೆಂಟ್‌ ಪದವೀಧರ. ತಮ್ಮ ವರ್ಕ್ಔಟ್ ಮತ್ತು ಆಹಾರವನ್ನು ಪಕ್ಕಾ ಸಮತೋಲನ ಮಾಡುವುದರಲ್ಲಿ ನಿಪುಣರು.
‘ನನ್ನ ಡಯಟ್ ಕಂಟ್ರೋಲರ್ ಅಮ್ಮ. ಮಗನಿಗೆ ಯಾವ ಸಮಯಕ್ಕೆ ಏನು ಆಹಾರ ಬೇಕು ಎನ್ನುವುದು ಅಮ್ಮನಿಗೆ ಸರಿಯಾಗಿ ಗೊತ್ತಿರುವುದರಿಂದಲೇ ಸರಿಯಾದ ಸಮಯಕ್ಕೆ ಡಯಟ್ ಪಾಲನೆಯಾಗುತ್ತದೆ. ವಾರವಿಡೀ ಡಯಟ್ ಚಾಚೂತಪ್ಪದೇ ಪಾಲಿಸುತ್ತೇನೆ. ವಾರಾಂತ್ಯದಲ್ಲಿ ಮನಸಿಗೆ ಇಷ್ಟವಾದದ್ದನ್ನು ಬೇಕಾದಷ್ಟು ತಿನ್ನುತ್ತೇನೆ’ ಎಂದು ಮುಕ್ತವಾಗಿ ಹೇಳಿಕೊಳ್ಳುತ್ತಾರೆ.
ವಾರದಲ್ಲಿ ಐದು ದಿನ ಜಿಮ್‌ಗೆ ಹೋಗುವ ಕರಣ್, ಬೆಳಿಗ್ಗೆ ಅಥವಾ ಸಂಜೆ ತಪ್ಪದೇ ವ್ಯಾಯಾಮ ಮಾಡುತ್ತಾರೆ. ಕಾರ್ಡಿಯೊ ಮತ್ತು ಭಾರ ಎತ್ತುವ ವ್ಯಾಯಾಮ ಮಾಡುತ್ತಾರೆ. ಸಿಕ್ಸ್‌ ಪ್ಯಾಕ್ ದೇಹವನ್ನು ಹೊಂದಿರುವ ಕರಣ್‌ಗೆ ಹದಿನಾರರ ಹರೆಯದಲ್ಲೇ ಜಿಮ್ ಬಗ್ಗೆ ವ್ಯಾಮೋಹ ಬೆಳೆದಿತ್ತಂತೆ. ದೇಹದ ತೂಕದಲ್ಲಿ ತುಸು ಏರಿಕೆ ಕಂಡೊಡನೆ ಕರಣ್, ಸಾಕಷ್ಟು ನೀರು, ಪ್ರೋಟೀನ್ ಶೇಕ್ ಮತ್ತು ನಾರಿನಂಶವುಳ್ಳ ಆಹಾರದ ಮೊರೆ ಹೋಗುತ್ತಾರೆ.
ಯಾವಾಗಲಾದರೊಮ್ಮೆ ಪಾರ್ಟಿಯಲ್ಲಿ ಮಾತ್ರ ಮದ್ಯಪಾನ ಮಾಡುವ ಕರಣ್, ಅಪ್ಪಿತಪ್ಪಿಯೂ ಸಿಗರೇಟ್ ಸೇದುವುದಿಲ್ಲ. ಸಿಗರೇಟ್ ಸೇವನೆ ಆರೋಗ್ಯಕ್ಕೆ ಅತಿಹೆಚ್ಚು ಹಾನಿಯುಂಟು ಮಾಡುತ್ತದೆ ಎಂಬುದು ಅವರ ದೃಢವಾದ ನಿಲುವು. ಸುಂದರ ತ್ವಚೆ ಮತ್ತು ಆರೋಗ್ಯಕ್ಕಾಗಿ ತುಸು ವೈನ್ ಹೀರುವುದನ್ನು ಕರಣ್ ಮರೆಯುವುದಿಲ್ಲ!
**
ಬೆಳಿಗ್ಗೆ ತಿಂಡಿಗೆ: ಹಣ್ಣಿನ ರಸ ಮತ್ತು ಓಟ್ಸ್‌
ಬೆಳಿಗ್ಗೆ 11: ಹಣ್ಣು ಮತ್ತು ಮೊಟ್ಟೆಯ ಬಿಳಿಭಾಗ
ಮಧ್ಯಾಹ್ನದ ಊಟಕ್ಕೆ: ಚಿಕನ್, ದಾಲ್–ಚಪಾತಿ
ರಾತ್ರಿ: ಅನ್ನ, ಚಿಕನ್, ಹಣ್ಣು, ತರಕಾರಿ ಸಲಾಡ್ ಮತ್ತು ಪಪ್ಪಾಯಿ
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.