ರಾಬಿನ್‌ ಉತ್ತಪ್ಪ ಶತಕ

ವಿಶಾಖಪಟ್ಟಣ (ಪಿಟಿಐ): ರಾಬಿನ್‌ ಉತ್ತಪ್ಪ (103) ಗಳಿಸಿದ ಸೊಗಸಾದ ಶತಕದ ನೆರವಿನಿಂದ ಭಾರತ ‘ಎ’ ತಂಡ ನ್ಯೂಜಿಲೆಂಡ್‌ ‘ಎ’ ವಿರುದ್ಧದ ಮೊದಲ ಏಕದಿನ ಕ್ರಿಕೆಟ್‌ ಪಂದ್ಯದಲ್ಲಿ ಆರು ವಿಕೆಟ್‌ಗಳ ಸುಲಭ ಗೆಲುವು ಪಡೆಯಿತು. ಡಾ. ವೈ.ಎಸ್‌. ರಾಜಶೇಖರ ರೆಡ್ಡಿ ಕ್ರೀಡಾಂಗಣದಲ್ಲಿ ಭಾನುವಾರ ನಡೆದ ಪಂದ್ಯದಲ್ಲಿ ಮೊದಲು ಬ್ಯಾಟ್‌ ಮಾಡಿದ ಪ್ರವಾಸಿ ತಂಡ 49.4 ಓವರ್‌ಗಳಲ್ಲಿ 257 ರನ್‌ ಗಳಿಸಿತು. ತಲಾ ಮೂರು ವಿಕೆಟ್‌ ಪಡೆದ ಧವಳ್‌ ಕುಲಕರ್ಣಿ, ರಾಹುಲ್‌ ಶರ್ಮ ಮತ್ತು ಅಶೋಕ್‌ ಮೆನಾರಿಯ ಎದುರಾಳಿ ತಂಡಕ್ಕೆ ಕಡಿವಾಣ ತೊಡಿಸಿದರು.

ಈ ಗುರಿ ಬೆನ್ನಟ್ಟಿದ ಭಾರತ ತಂಡಕ್ಕೆ ಉತ್ತಪ್ಪ ಮತ್ತು ಉನ್ಮುಕ್ತ್‌ ಚಾಂದ್‌ (94) ಅತ್ಯುತ್ತಮ ಆರಂಭ ನೀಡಿದರು. ಮೊದಲ ವಿಕೆಟ್‌ಗೆ ಇವರು 178 ರನ್‌ಗಳನ್ನು ಸೇರಿಸಿದರು. 114 ಎಸೆತಗಳನ್ನು ಎದುರಿಸಿದ ಕೊಡಗಿನ ಆಟಗಾರ 8 ಬೌಂಡರಿ ಹಾಗೂ 5 ಸಿಕ್ಸರ್‌ಗಳನ್ನು ಸಿಡಿಸಿದರು. ಆಕ್ರಮಣಕಾರಿ ಬ್ಯಾಟಿಂಗ್‌ ಪ್ರದರ್ಶನ ನೀಡಿದ ಚಾಂದ್‌ 88 ಎಸೆತಗಳನ್ನು ಎದುರಿಸಿ 9 ಬೌಂಡರಿ ಹಾಗೂ ಆರು ಸಿಕ್ಸರ್‌ಗಳನ್ನು ಸಿಡಿಸಿದರು.

ಸಂಕ್ಷಿಪ್ತ ಸ್ಕೋರ್‌: ನ್ಯೂಜಿಲೆಂಡ್‌ ‘ಎ’: 49.4 ಓವರ್‌ಗಳಲ್ಲಿ 257 (ಆ್ಯಂಟನ್‌ ಡೇವ್‌ಸಿಚ್‌ 48, ಕಾರ್ಲ್‌ ಸಶೋಪಾ 45, ಡ್ಯಾರಿಲ್‌ ಮಿಷೆಲ್‌ 51, ಇಂದರ್‌ಬಿರ್‌ ಸಿಂಗ್ ಸೋಧಿ 29, ಧವಳ್‌ ಕುಲಕರ್ಣಿ 38ಕ್ಕೆ 3,  ರಾಹುಲ್‌ ಶರ್ಮ 45ಕ್ಕೆ 3, ಅಶೋಕ್‌ ಮೆನಾರಿಯ 43ಕ್ಕೆ 3)
ಭಾರತ ‘ಎ’: 44.1 ಓವರ್‌ಗಳಲ್ಲಿ 4 ವಿಕೆಟ್‌ಗೆ 261 (ರಾಬಿನ್‌ ಉತ್ತಪ್ಪ 103, ಉನ್ಮುಕ್ತ್‌ ಚಾಂದ್‌ 94, ಆದಿತ್ಯ ತಾರೆ ಔಟಾಗದೆ 37, ಆ್ಯಡಮ್‌ ಮಿಲ್ನ್‌ 43ಕ್ಕೆ 3)