ಊರ ಕೆರೆ

 

ನಮ್ಮ ಊರಿನ

ದೊಡ್ಡ ಕೆರೆಯನು

ಹಿರಿಯರೆಂದೊ ಕಟ್ಟಿಸಿಹರು

ಬತ್ತಿ ಹೋಗದ

ಹಾಗೆ ಕೆರೆಗದು

ಆಳ ಅಗಲವ ಇಟ್ಟಿಹರು!

 

ಸುತ್ತ ಎಲ್ಲೆಡೆ

ಏರಿ ನಿರ್ಮಿಸಿ

ಸಾಲು ಮರಗಳ ಬೆಳೆಸಿಹರು

ಮಳೆಗಾಲದಿ

ಹರಿವ ಕೋಡಿಗೆ

ಮಾರ್ಗಗಳನು ರಚಿಸಿಹರು!

 

ಬಾವಿಗಳಿಗೆ

ನೀರನುಣಿಸುವ

ಕೆರೆಯ ಕಾರ್ಯ ಅರಿತವರು

ಜಲದ ಕೊರತೆಯು

ಕಾಡದಂತೆ 

ಮುಂದಾಲೋಚನೆ ಮಾಡಿಹರು!

 

ಪ್ರಾಣಿ ಪಕ್ಷಿಗೆ

ನೀರನೊದಗಿಸಿ

ಲೋಕಹಿತವನು ಬಯಸಿಹರು

ಊರ ಪರಿಸರ

ಹಿತವಾಗಿಸಿ

ನಮಗೆ ಅರಿವನು ಕೊಟ್ಟಿಹರು!

 

ಊರಿಗೊಂದು

ಕೆರೆಯಿರಲೆಂಬ

ಕಳಕಳಿಯ ಮಿಡಿದಿಹರು

ಜಲದ ನಿಧಿಯ

ಕಾಯ್ದುಕೊಳ್ಳಲು

ಮನದ ಮಾತನು ಹೇಳಿಹರು!

 

–ಸಂಗಮೇಶ ಗುಜಗೊಂಡ, ಮೂಡಲಗಿ

 

*****

ನನ್ನ ತಮ್ಮ

ಗುಮ್ಮ ಬಂದ
ಗುಮ್ಮ ಬಂದ
ಮಲಗು ನನ್ನ ತಮ್ಮ

ಗುಮ್ಮ ಬರಲು
ಹೆದರುವೆನೆ
ಜೊತೆಗೆ ಇರಲು ಅಮ್ಮ

ಕೋತಿ ಬಂತು
ಕರಡಿ ಬಂತು
ಮಲಗು ಜಾಣ ಮರಿ

ಕೋತಿ ಬರಲಿ
ಕರಡಿ ಬರಲಿ
ಅಪ್ಪನನ್ನು ಕರಿ

ಅಲ್ಲಿ ಬಂತು
ಇಲ್ಲಿ ಬಂತು
ದೊಡ್ಡದೊಂದು ಭೂತ

ಭೂತ ಬರಲಿ
ಪ್ರೇತ ಬರಲಿ
ಮನೆಯಲಿರುವ ತಾತ!

ಸಿಂಹ ಬಂತು
ತೋಳ ಬಂತು
ನೋಡು ಅದರ ಭಂಗಿ

ಭಯವು ಯಾಕೆ
ಮನೆಯಲಿರಲು
ಕೆಲಸದಾಳು ನಿಂಗಿ

ಕತ್ತೆ ಬಂತು
ನರಿ ಬಂತು
ನೋಡು ಎದ್ದು ಮತ್ತೆ

ಬಂದರೇನು
ಮಾಡುವವು
ಮನೆಯ ಒಳಗೆ ಅತ್ತೆ

ಮಲಗೋ ತಮ್ಮ
ಮಲಗೋ ತಮ್ಮ
ಪದಗಳೆಲ್ಲ ಖಾಲಿ

ಅವ್ವ ಬರಲಿ
ಮಲಗುವೆನು
ಹಾಡಿದರೆ ಲಾಲಿ!