ಮೃದು ರೇಷ್ಮೆ ಘಟಕ ತಿಂಗಳಲ್ಲಿ ಕಾರ್ಯಾರಂಭ

ಮೈಸೂರು: ರಾಮನಗರ ಜಿಲ್ಲೆ ಚನ್ನಪಟ್ಟಣದಲ್ಲಿ ಮೃದು ರೇಷ್ಮೆ ಘಟಕವು ಇನ್ನೊಂದು ತಿಂಗಳಲ್ಲಿ ಕಾರ್ಯಾರಂಭ ಮಾಡಲಿದೆ ಎಂದು ರೇಷ್ಮೆ ಉದ್ಯಮಗಳ ನಿಗಮದ ಅಧ್ಯಕ್ಷ ಎಂ.ಕೆ.ಸೋಮಶೇಖರ್‌ ಇಲ್ಲಿ ಶನಿವಾರ ತಿಳಿಸಿದರು.

ಚನ್ನಪಟ್ಟಣದಲ್ಲಿ ಸ್ಥಗಿತಗೊಂಡಿದ್ದ ಘಟಕದ ಆವರಣದಲ್ಲಿಯೇ ₹ 8.77 ಕೋಟಿ ಯೋಜನಾ ವೆಚ್ಚದಲ್ಲಿ ಸಂಘಟಿತ ರೇಷ್ಮೆ ನೇಯ್ಗೆ ಕಾರ್ಖಾನೆ ಆರಂಭಿಸಲಾಗುತ್ತಿದೆ.

30 ಯಂತ್ರಚಾಲಿತ ಮಗ್ಗಗಳು, ವೈಂಡಿಂಗ್‌, ಡಬ್ಲಿಂಗ್‌, ಟ್ವಿಸ್ಟಿಂಗ್‌, ಡೈಯಿಂಗ್‌ ಯಂತ್ರಗಳನ್ನು ಅಳವಡಿಸಲಾಗಿದೆ ಎಂದು ಪತ್ರಿಕಾಗೋಷ್ಠಿಯಲ್ಲಿ ಮಾಹಿತಿ ನೀಡಿದರು.

ಮೃದು ರೇಷ್ಮೆ (ಸಾಫ್ಟ್‌ ಸಿಲ್ಕ್‌) ಘಟಕದಲ್ಲಿ ಕ್ರೇಪ್‌, ಜಾರ್ಜೆಟ್‌ ಬಟ್ಟೆಗಳನ್ನು ತಯಾರಿಸಬಹುದಾಗಿದೆ. ಮೈಸೂರು ಸಿಲ್ಕ್‌ ಸೀರೆಯ ಆರಂಭಿಕ ದರ ₹ 10 ಸಾವಿರ ಇದೆ. ಇದಕ್ಕಿಂತ ಕಡಿಮೆ ದರದ ಸಾಫ್ಟ್‌ ಸಿಲ್ಕ್‌ ಸೀರೆಗಳನ್ನು ಈ ಘಟಕದಲ್ಲಿ ತಯಾರಿಸಲಾಗುವುದು. ₹ 5 ಸಾವಿರ ಆರಂಭಿಕ ದರದ ಮೈಸೂರು ಸಿಲ್ಕ್‌ ಸೀರೆಗಳು ಗ್ರಾಹಕರಿಗೆ ಲಭಿಸಲಿವೆ ಎಂದು ಹೇಳಿದರು.