ರಫ್ತು ವಹಿವಾಟು ವೃದ್ಧಿ

ನವದೆಹಲಿ:  ಅಂತರರಾಷ್ಟ್ರೀಯ ಸರಕು ಮಾರುಕಟ್ಟೆ ಚೇತರಿಕೆ ಕಂಡುಕೊಳ್ಳುತ್ತಿರುವುದರಿಂದ ದೇಶದ ರಫ್ತು ವಹಿವಾಟು ಸತತ ಐದನೇ ತಿಂಗಳಿನಲ್ಲಿಯೂ ಏರಿಕೆ ಕಂಡಿದೆ.

ಜನವರಿಯಲ್ಲಿ ಪೆಟ್ರೋಲಿಯಂ ಉತ್ಪನ್ನಗಳು, ಎಂಜಿನಿಯರಿಂಗ್‌ ವಸ್ತುಗಳು ಮತ್ತು ಕಬ್ಬಿಣದ ಅದಿರು ರಫ್ತು ಹೆಚ್ಚಾಗಿರುವುದರಿಂದ ₹1.49 ಲಕ್ಷ ಕೋಟಿ ಮೌಲ್ಯದ ಸರಕುಗಳನ್ನು ರಫ್ತು ಮಾಡಲಾಗಿದ್ದು ಶೇ 4.32 ರಷ್ಟು ಪ್ರಗತಿ ಸಾಧಿಸಲಾಗಿದೆ ಎಂದು ಕೇಂದ್ರ ವಾಣಿಜ್ಯ ಸಚಿವಾಲಯ ಮಾಹಿತಿ ನೀಡಿದೆ.

ಆಮದು: ಆಮದು ಪ್ರಮಾಣವೂ ಶೇ 11 ರಷ್ಟು ತಗ್ಗಿದ್ದು, ₹2.17 ಲಕ್ಷ ಕೋಟಿ ಮೌಲ್ಯದ ವಸ್ತುಗಳು ಆಮದಾಗಿವೆ.

ಚಿನ್ನ ಆಮದು ಇಳಿಕೆ: ನೋಟು ರದ್ದತಿಯಿಂದ ಚಿನ್ನದ ಬೇಡಿಕೆಯೂ ತಗ್ಗಿದೆ. ಹೀಗಾಗಿ ಚಿನ್ನದ ಆಮದು ಶೇ 30 ರಷ್ಟು ಕುಸಿತ ಕಂಡಿದೆ.
ವಹಿವಾಟಿನ ಪ್ರಮಾಣವು ₹20,400 ಕೋಟಿಗಳಿಂದ ₹13,600 ಕೋಟಿಗಳಿಗೆ ಇಳಿಕೆಯಾಗಿದೆ.

ಅಮೆರಿಕದ ಆರ್ಥಿಕ ರಕ್ಷಣಾ ನೀತಿ, ಕರೆನ್ಸಿ ಚಂಚಲತೆ, ಜಾಗತಿಕ ಆರ್ಥಿಕತೆಯು ಅನಿಶ್ಚಿತತೆ ದೇಶಿ ರಫ್ತು ಉದ್ಯಮದ ಪಾಲಿಗೆ ಬಹು ದೊಡ್ಡ ಸವಾಲು ಎಂದು ಭಾರತದ ರಫ್ತುದಾರರ ಒಕ್ಕೂಟಗಳ ಸಂಘಟನೆ (ಎಫ್‌ಐಇಒ) ಅಧ್ಯಕ್ಷ ಎಸ್‌.ಸಿ. ರಹ್ಲಾನ್‌ ಅವರು ಅಭಿಪ್ರಾಯಪಟ್ಟಿದ್ದಾರೆ.