ಕೊಟ್ಟೂರು: ಸರ್ಕಾರ ಬಯಲು ಶೌಚ ಮುಕ್ತಗೊಳಿಸಲು ವೈಯಕ್ತಿಕ ಶೌಚಾಲಯ ನಿಮಾರ್ಣ ಮಾಡಿಕೊಳ್ಳಲು ಅನುದಾನ ಬಿಡುಗಡೆಗೊಳಿಸಿದೆ. ಆದರೆ ಯೋಜನೆಯಡಿ ಆಯ್ಕೆಯಾದ ಫಲಾನುಭವಿಗಳಿಗೆ ಹಣ ತಲುಪದೆ ನಕಲು ದಾಖಲೆ ಸೃಷ್ಟಿಸಿ ಹಣ ಗುಳಂ ಮಾಡಿರುವ ಘಟನೆ ಪಟ್ಟಣಕ್ಕೆ ಸಮೀಪದ ಜುಮ್ಮೋಬನಹಳ್ಳಿ ಗ್ರಾಮ ಪಂಚಾಯ್ತಿಯಲ್ಲಿ ನಡೆದಿದೆ.
ಗ್ರಾಮ ಪಂಚಾಯ್ತಿ ವತಿಯಿಂದ 2016–17 ಸಾಲಿನಲ್ಲಿ ವೈಯಕ್ತಿಕ ಶೌಚಾಲಯ ಕಟ್ಟಿಸಿಕೊಳ್ಳಲು 64 ಮಹಿಳಾ ಫಲಾನುಭವಿಗಳನ್ನು ಆಯ್ಕೆ ಮಾಡಲಾಗಿತ್ತು.
ಬಹುತೇಕ ಫಲಾನುಭವಿಗಳು ಶೌಚಾಲಯ ಕಟ್ಟಿಸಿಕೊಂಡಿದ್ದಾರೆ. ಇದರಲ್ಲಿ 26 ಫಲಾನುಭವಿಗಳ ಹೆಸರಿನಲ್ಲಿ ನಕಲಿ ದಾಖಲೆ ಸೃಷ್ಟಿಸಿ ಬೇರೆ ಹೆಸರಿನ ಖಾತೆಗೆ ಹಣ ಜಮೆ ಮಾಡಲಾಗಿದೆ. ಇದರಲ್ಲಿ ಕೆಲವರು ಶೌಚಾಲಯವನ್ನೇ ಕಟ್ಟಿಸಿಕೊಂಡಿಲ್ಲ. ಅವ್ಯವಹಾರದಲ್ಲಿ ಗ್ರಾಮ ಪಂಚಾಯ್ತಿ ಪಿಡಿಓ, ಅಧ್ಯಕ್ಷರು ಹಾಗೂ ಕಂಪ್ಯೂಟರ್ ಅಪರೇಟರ್ ಕೈವಾಡ ಇರುವ ಶಂಕೆ ವ್ಯಕ್ತವಾಗಿದೆ.
ಸಾಮಾನ್ಯ ವರ್ಗಕ್ಕೆ ₹ 12 ಸಾವಿರ ಹಾಗೂ ಎಸ್.ಸಿ , ಎಸ್ಟಿ ಗೆ ₹ 15 ಸಾವಿರ ಸಹಾಯ ಧನ ನೀಡಲಾಗುತ್ತದೆ. ಇದರಂತೆ ಗ್ರಾಂಮ ಪಂಚಾಯ್ತಿ ವ್ಯಾಪ್ತಿಯ ಕುಮತಿಯಲ್ಲಿ 11, ಜುಮ್ಮೋಬನಹಳ್ಳಿಯಲ್ಲಿ 8, ಲೋಕಿಕೆರೆಯಲ್ಲಿ 7 ಫಲಾನುಭವಿಗಳ ಪೈಕಿ ಕೆಲವರು ಮಾತ್ರ ವೈಯಕ್ತಿವಾಗಿ ಶೌಚಾಲಯ ಕಟ್ಟಿಕೊಂಡಿದ್ದರೂ ನಿಜವಾದ ಫಲಾನುಭವಿಗಳ ಖಾತೆಗೆ ಹಣ ಪಾವತಿಯಾಗದೆ, ಬೇರೆಯವರ ಖಾತೆಗೆ ಹಣ ಪಾವತಿ ಮಾಡಲಾಗಿದೆ. ಇದರಿಂದ ಯೋಜನೆಯ ಒಟ್ಟು ₹ 3.90 ಲಕ್ಷ ಹಣ ಫಲಾನುಭವಿಗಳ ಖಾತೆಯಲ್ಲದ ಬೇರೆ ಖಾತೆಗೆ ಹಣ ಪಾವತಿ ಮಾಡಲಾಗಿದೆ ಎಂಬುದು ಸ್ಥಳೀಯರ ದೂರಿದ್ದಾರೆ.
ಬಳ್ಳಾರಿ ಎಸ್.ಬಿ.ಎಂ. ಹಾಗೂ ಪ್ರಗತಿ, ಸಿಂಡಿಕೇಟ್ ಸೇರಿ ಇತರೆ ಬ್ಯಾಂಕ್ ಖಾತೆ ಸಂಖ್ಯೆಗೆ 18 ಫಲಾನುಭವಿಗಳು, ಸಂಡೂರಿನ ಮೂರು ಬ್ಯಾಂಕ್ ಗಳ ಖಾತೆಗೆ 3 ಫಲಾನುಭವಿಗಳು, ಕುಡುತಿನಿ ಎಸ್.ಬಿ.ಐ ಬ್ಯಾಂಕ್ ನಲ್ಲಿ 2 ಖಾತೆಗೆ, ಚಿಕ್ಕಜೋಗಿಹಳ್ಳಿ ಎಸ್.ಬಿ.ಎಂ ಬ್ಯಾಂಕ್ ನಲ್ಲಿ ಮೂವರಿಗೆ, ತೋರಣಗಲ್ಲು ವಿಜಯ ಬ್ಯಾಂಕ್ 1, ಬೆಂಗಳೂರಿನ ಐಸಿಐಸಿಐ ಬ್ಯಾಂಕ್ ನಲ್ಲಿ ಇಬ್ಬರ ಖಾತೆಗಳ ಹೆಸರಿಗೆ ಒಟ್ಟು 26 ಫಲಾನುಭವಿಗಳ ₹ 3.90 ಲಕ್ಷ ಯೋಜನೆ ಹಣವನ್ನು ಜಮೆ ಮಾಡಲಾಗಿದೆ.
‘ಶೌಚಗೃಹ ಕಟ್ಟಿಸಿಕೊಂಡ ನಿಜವಾದ ಫಲಾನುಭವಿಗಳ ಖಾತೆ ಬದಲಿಗೆ ಜಿಲ್ಲೆಯ ವಿವಿಧ ಬ್ಯಾಂಕ್ಗಳ ಖಾತೆ ಸಂಖ್ಯೆಗೆ ಶೌಚಗೃಹ ಹಣ ಜಮೆ ಮಾಡಿರುವುದು ದಾಖಲೆಗಳ ಪರಿಶೀಲನೆ ವೇಳೆ ಬೆಳಕಿಗೆ ಬಂದಿದೆ. ಹೀಗಾಗಿ ಗ್ರಾಮ ಪಂಚಾಯ್ತಿ ಪಿಡಿಓ ಮತ್ತು ಅಧ್ಯಕ್ಷರ ವಿರುದ್ದ ಕಾನೂನು ಕ್ರಮ ಕೈಗೊಳ್ಳುವಂತೆ ಜಿಲ್ಲಾ ಪಂಚಾಯ್ತಿಗೆ ವರದಿ ಸಲ್ಲಿಸಲಾಗುವುದು’ ಎಂದು ತಾಲ್ಲೂಕು ಪಂಚಾಯ್ತಿ ಕಾರ್ಯನಿರ್ವಹಣಾಧಿಕಾರಿ ಕೃಷ್ಣನಾಯ್ಕ ತಿಳಿಸಿದರು.
‘ನಾನು ಒಂದು ತಿಂಗಳ ಹಿಂದೆ ಬಂದಿದ್ದೇನೆ. ನನ್ನ ಹಿಂದೆ ಕಾರ್ಯನಿರ್ವಹಿಸಿದ ಪಿಡಿಓ ಅವಧಿಯಲ್ಲಿ ಈ ಘಟನೆ ನಡೆದಿದೆ, ನಾನು ಯಾವ ತಪ್ಪು ಮಾಡಿಲ್ಲ’ ಎಂದು ಗ್ರಾಮ ಪಂಚಾಯ್ತಿ ಪಿಡಿಓ ನಾರಾಯಣಪ್ಪ ತಿಳಿಸಿದರು.