ವಿಶೇಷ ಕಾರ್ಯಾಚರಣೆ: 129 ಬೈಕ್ ಜಪ್ತಿ

ಬೆಂಗಳೂರು: ಡ್ರ್ಯಾಗ್‌ ರೇಸ್‌ ಮತ್ತು ವ್ಹೀಲಿಂಗ್  ಮಾಡುವವರ ವಿರುದ್ಧ ಕ್ರಮ ಕೈಗೊಳ್ಳಲು ಮಂಗಳವಾರ ರಾತ್ರಿ  ವಿಶೇಷ ಕಾರ್ಯಾಚರಣೆ ನಡೆಸಿರುವ ಸಂಚಾರ ಪೊಲೀಸರು, 129 ಬೈಕ್‌ಗಳನ್ನು ಜಪ್ತಿ ಮಾಡಿದ್ದಾರೆ.

ಸಾರ್ವಜನಿಕ ಸ್ಥಳಗಳಲ್ಲಿ ವ್ಹೀಲಿಂಗ್ ಮಾಡಿ ಅಜಾಗರೂಕತೆಯಿಂದ ವಾಹನ ಚಾಲನೆ ಮಾಡಿದ ಆರೋಪದ ಮೇಲೆ 22 ಜನರನ್ನು ವಶಕ್ಕೆ ಪಡೆಯಲಾಗಿದೆ ಎಂದು ಪೊಲೀಸರು ಹೇಳಿದ್ದಾರೆ.

ಮಂಗಳವಾರ ರಾತ್ರಿ ‘ಷಬ್‌ ಎ ಬರಾತ್‌’ ಹಬ್ಬದ ಅಂಗವಾಗಿ ಯುವಕರು ವ್ಹೀಲಿಂಗ್‌, ಡ್ರ್ಯಾಗ್‌ ರೇಸ್‌ ಮಾಡುತ್ತಿದ್ದರು. ಹೀಗಾಗಿ ಆರ್‌.ಟಿ.ನಗರ, ಹೆಬ್ಬಾಳ ಹಾಗೂ ಯಲಹಂಕ ಸಂಚಾರ ಠಾಣೆ ವ್ಯಾಪ್ತಿಯಲ್ಲಿ ರಾತ್ರಿ 8 ರಿಂದ ಬೆಳಿಗ್ಗೆ 5 ಗಂಟೆವರೆಗೆ ವಿಶೇಷ ಕಾರ್ಯಾಚರಣೆ  ನಡೆಸಲಾಯಿತು ಎಂದು ಸಂಚಾರ ವಿಭಾಗದ ಹೆಚ್ಚುವರಿ ಪೊಲೀಸ್‌ ಕಮಿಷನರ್‌ ಎಂ.ಎ.ಸಲೀಂ ಅವರು ತಿಳಿಸಿದರು.

ಡ್ರ್ಯಾಗ್‌ ರೇಸ್‌ನಲ್ಲಿ ತೊಡಗಿದ್ದ ಬೈಕ್ ಸವಾರರ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ. ಅಲ್ಲದೇ, ಅವರ ಚಾಲನಾ ಪರವಾನಗಿ ರದ್ದುಪಡಿಸುವಂತೆ ಸಾರಿಗೆ ಇಲಾಖೆಗೆ ಮನವಿ ಕಳುಹಿಸಲಾಗುವುದು  ಎಂದು ಹೇಳಿದರು.