29ರಿಂದ ನೃತ್ಯ– ಸಂಗೀತ ಉತ್ಸವ

ಬೆಂಗಳೂರು: ಸೃಷ್ಟಿ ಅಭಿನಯ ಕಲಾವಿದರ ಕೇಂದ್ರವು ಏ. 29ರಿಂದ ಮೇ 7ರವರೆಗೆ  ನಗರದ ವಿವಿಧ ಸ್ಥಳಗಳಲ್ಲಿ ನೃತ್ಯ, ನಾಟಕ, ಸಂಗೀತ ಮತ್ತು ಯೋಗ ಉತ್ಸವ ಆಯೋಜಿಸಿದೆ.

ಸುದ್ದಿಗೋಷ್ಠಿಯಲ್ಲಿ ಮಂಗಳವಾರ ಮಾತನಾಡಿದ ಕೇಂದ್ರದ ನಿರ್ದೇಶಕ ಎ.ವಿ.ಸತ್ಯನಾರಾಯಣ ಅವರು, ‘9 ದಿನಗಳಲ್ಲಿ 55 ತಂಡಗಳ 224 ಕಲಾವಿದರು ಪ್ರದರ್ಶನ ನೀಡಲಿದ್ದಾರೆ. ತಮಿಳುನಾಡು, ಆಂಧ್ರ ಪ್ರದೇಶ, ಒಡಿಶಾ, ಪಶ್ಚಿಮ ಬಂಗಾಳ, ಮೇಘಾಲಯ, ದೆಹಲಿ ಮತ್ತು ಮಹಾರಾಷ್ಟ್ರದ ಕಲಾವಿದರು ಆಯಾ ರಾಜ್ಯಗಳ ಕಲೆಗಳನ್ನು ಪ್ರದರ್ಶಿಸಲಿದ್ದಾರೆ. ಮೋಹಿನಿಯಾಟ್ಟಂ, ಕೂಚಿಪುಡಿ, ಒಡಿಸ್ಸಿ ಮತ್ತು ಕಥಕ್‌ ನೃತ್ಯ ಪ್ರದರ್ಶನಗಳು ಇರಲಿವೆ’ ಎಂದು ತಿಳಿಸಿದರು.

‘ಕಲಾವಿದೆ ಕನಕಾ ರೆಲೆ ಅವರು ಏ. 30ರಂದು ಮೋಹಿನಿಯಾಟ್ಟಂ ಪ್ರದರ್ಶನ ನೀಡಲಿದ್ದಾರೆ. ಮಹಾನ್‌ ಬುದ್ಧ ನೃತ್ಯರೂಪಕ ಇರಲಿದೆ. ರವೀಂದ್ರ ಕಲಾಕ್ಷೇತ್ರ, ಸಂಸ ಬಯಲು ಮಂದಿರ, ಕೃಷ್ಣದೇವರಾಯ ಕಲಾಭವನ, ನಯನ ಸಭಾಂಗಣಗಳಲ್ಲಿ ಕಾರ್ಯಕ್ರಮಗಳು ನಡೆಯಲಿವೆ’ ಎಂದು ಹೇಳಿದರು.