ಅಧಿಕಾರಿಗಳಿಗೆ ಇಸ್ರೇಲ್ ದೇಶ ಮಾದರಿಯಾಗಲಿ

ಪಟ್ಟಣದ ಎಸ್.ಎಂ.ಲಿಂಗಪ್ಪ ಸಮುದಾಯಭವನದಲ್ಲಿ ರಾಜ್ಯ ರೈತ ಸಂಘ, ಸ್ವಾಮಿ ವಿವೇಕಾನಂದ ಸೇವಾ ಟ್ರಸ್ಟ್, ಮಂಡ್ಯ ಜಿಲ್ಲಾ ಪಂಚಾಯತ್ ಮತ್ತು ತಾಲ್ಲೂಕು ಕೃಷಿ ಇಲಾಖೆಗಳ ಆಶ್ರಯದಲ್ಲಿ ಮಂಗಳವಾರ ಆಯೋಜಿಸಿದ್ದ ‘ಜಲ ಬಿಕ್ಕಟ್ಟು- ಕಾರಣಗಳು ಹಾಗೂ ಪರ್ಯಾಯಗಳು’ ಹಾಗೂ ‘ಜಾಗತಿಕ ತಾಪಮಾನ ಮತ್ತು ಅದನ್ನು ತಡಗಟ್ಟುವಲ್ಲಿ ರೈತರ ಪಾತ್ರ’ ಕುರಿತ ವಿಚಾರಸಂಕಿರಣದ ಅಧ್ಯಕ್ಷತೆ ವಹಿಸಿ ಮಾತನಾಡಿದರು.

 

ನಮ್ಮಲ್ಲಿ ಭೂಸಂಪತ್ತು – ಜಲಸಂಪತ್ತು ಹೇರಳವಾಗಿದೆ. ಆದರೆ, ಅದರ ಬಳಕೆಯ ಬಗ್ಗೆ ಜನರಲ್ಲಿ ಜಾಗೃತಿ ಇಲ್ಲ. ಸರ್ಕಾರದ ಕೃಷಿ ಇಲಾಖೆಯ ಅಧಿಕಾರಿಗಳಿಗೆ ಆ ಬಗ್ಗೆ ಚಿಂತನೆಯೇ ಇಲ್ಲ. ಯಾವ ಭೂಮಿಯಲ್ಲಿ ಯಾವ ಬೆಳೆ ತೆಗೆಯಬೇಕು, ಮಣ್ಣಿನ ಫಲವತ್ತತೆ ಹೇಗೆ ಎಂಬ ಬಗ್ಗೆ ಜನರಿಗೆ ತಿಳುವಳಿಕೆ ಇಲ್ಲ. ನಮ್ಮಲ್ಲಿ ದೊಡ್ಡ ಪ್ರಮಾಣದ ಕೃಷಿ ಇಲಾಖೆಯೇನೋ ಇದೆ. ಆದರೆ ಅದರ ಪ್ರಯೋಜನ ರೈತರಿಗೆ ಸಮರ್ಪಕವಾಗಿ ಸಿಗುತ್ತಿಲ್ಲ  ಎಂದು ವಿಷಾದಿಸಿದರು.

 

ಇಸ್ರೇಲ್ ದೇಶದ ಕೃಷಿ ಇಲಾಖೆಯ ಅಧಿಕಾರಿಗಳು  ಪ್ರತಿವರ್ಷ ಪ್ರತಿ ರೈತರ ಭೂಮಿಯ ಮಣ್ಣಿನ ಆರೋಗ್ಯದ ಬಗ್ಗೆ ಪರಿಶೀಲನೆ ನಡೆಸಿ ಕೃಷಿ ಬೆಳೆಯ ಬಗ್ಗೆ ಮಾಹಿತಿ ನೀಡುತ್ತಾರೆ. ಇಂತಹ ಬದಲಾವಣೆ ನಮ್ಮಲ್ಲೂ ಆಗಬೇಕು ಎಂದರು. 

 

ಚಿತ್ರದುರ್ಗದ ಜಲತಜ್ಞ ಡಾ.ದೇವರಾಜರೆಡ್ಡಿ ಅಂತರ್ಜಲ ಮರು ಜೋಡನೆ ಕುರಿತು ಮಾತನಾಡಿದರು. ಮೈಸೂರಿನ ಸಹಜ ಸಮೃದ್ಧಿ ದೇಶೀಯ ಬೀಜಗಳ ಸಂರಕ್ಷಕ ಕೃಷ್ಣಪ್ರಸಾದ್ ದೇಶಿ ಬೀಜಗಳ ಸಂರಕ್ಷಣೆಯ ಅಗತ್ಯತೆ ಬಗ್ಗೆ ಮಾತನಾಡಿದರು.
 

ರಾಜ್ಯ ರೈತ ಸಂಘದ ಮಹಿಳಾ ಘಟಕದ ಅಧ್ಯಕ್ಷೆ ನಂದಿನಿ ಜಯರಾಂ ಜಾಗತಿಕ ತಾಪಮಾನ ಮತ್ತು ಅದನ್ನು ತಡಗಟ್ಟುವಲ್ಲಿ ರೈತರ ಪಾತ್ರ ಕುರಿತು ಮಾತನಾಡಿದರು. 

ಜಿಲ್ಲಾ ರೈತ ಸಂಘದ ಮಾಜಿ ಅಧ್ಯಕ್ಷ ಎಂ.ವಿ.ರಾಜೇಗೌಡ, ರಾಜ್ಯ ರೈತಸಂಘದ ಉಪಾಧ್ಯಕ್ಷ ಕೆ.ಆರ್.ಜಯರಾಂ, ತಾಲ್ಲೂಕು ಘಟಕದ ಅಧ್ಯಕ್ಷ ಮರು ವನಹಳ್ಳಿ ಶಂಕರ್, ಮುಖಂಡರಾದ ಗೂಡೇಹೊಸಹಳ್ಳಿ ಜವರಾಯಿಗೌಡ, ಚನ್ನಿಂಗೇಗೌಡ, ನಾಯಕನಹಳ್ಳಿ ಬಿ.ನಂಜಪ್ಪ, ತಾಲ್ಲೂಕು ಸಹಾಯಕ ಕೃಷಿ ನಿರ್ದೇಶಕ ಕೆಂಚೇಗೌಡ ಇದ್ದರು.