ಜಿಲ್ಲೆಯಲ್ಲಿ ಸಂಭ್ರಮದ ಹೋಳಿ ಆಚರಣೆ

ಶಿವಮೊಗ್ಗ: ಜಿಲ್ಲೆಯಾದ್ಯಂತ ಸೋಮ ವಾರ ಸಂಭ್ರಮದ ಹೋಳಿ ಆಚರಣೆ ನಡೆಯಿತು. ಯುವಕ- ಯುವತಿಯರು, ನಾಗರಿಕರು, ಹಿರಿಯರು ಹಾಗೂ ಸಣ್ಣ ಮಕ್ಕಳು ನಗರದೆಲ್ಲೆಡೆ ಪರಸ್ಪರ ಬಣ್ಣ ಹಚ್ಚುವ ಮೂಲಕ ಸಡಗರದಿಂದ ಹೋಳಿ ಹಬ್ಬ ಆಚರಿಸಿದರು.

ಸ್ನೇಹಿತರ ಮನೆಗಳಿಗೆ ಹುಡುಕಿ ಕೊಂಡು ತೆರಳಿದ ಕೆಲವರು ಪರಸ್ಪರ ಬಣ್ಣ ಹಚ್ಚಿಕೊಂಡ ದೃಶ್ಯ ಸಾಮಾನ್ಯವಾಗಿತ್ತು. ಗಾಂಧಿಬಜಾರ್, ದುರ್ಗಿಗುಡಿ, ವಿನೋಬನಗರ, ಗಾಂಧಿನಗರ, ಸೀಗೆಹಟ್ಟಿ, ಕೆ.ಆರ್. ಪುರಂ ಸೇರಿದಂತೆ ವಿವಿಧ ಬಡಾವಣೆಗಳಲ್ಲಿ ಯುವಕರು ಬಣ್ಣದೋಕುಳಿಯಲ್ಲಿ ಮಿಂದೆದ್ದರು. ಕೆಲ ಏರಿಯಾಗಳಲ್ಲಿ ಹಾಡು, ನೃತ್ಯ, ಪಿಚಕಾರಿ ಹಾಗೂ ಮಡಿಕೆ ಒಡೆಯುವ ದೃಶ್ಯವೂ ಮುಗಿಲುಮುಟ್ಟಿತ್ತು.

ಜಿಲ್ಲೆಯ ಬಹುತೇಕ ಕಡೆ ಭಾನುವಾರ ಹೋಳಿ ಆಚರಿಸಲಾಗಿತ್ತು. ನಗರದಲ್ಲಿ ಪ್ರತಿವರ್ಷವೂ ದುರ್ಗಿಗುಡಿಯ ದುರ್ಗಮ್ಮ ದೇವಿಯ ರಥೋತ್ಸವದ ನಂತರದ ದಿನ ಹೋಳಿ ಆಚರಿಸುವುದು ವಾಡಿಕೆಯಾದ್ದರಿಂದ ನಗರದ ಹೆಚ್ಚಿನ ಭಾಗದಲ್ಲಿ ಸೋಮವಾರ ಆಚರಿಸಲಾಯಿತು. ಗಾಂಧಿಬಜಾರ್, ರವಿವರ್ಮ ಬೀದಿ, ಕುಂಬಾರ ಬೀದಿ ಸೇರಿದಂತೆ ಹಲವೆಡೆ ಮನ್ಮಥ ಮೂರ್ತಿ ಪ್ರತಿಷ್ಠಾಪಿಸಲಾಗಿತ್ತು.