ಗರಿಷ್ಠ ಮತದಾನಕ್ಕಾಗಿ ಅವಧಿ ವಿಸ್ತರಣೆ

ನವದೆಹಲಿ (ಐಎಎನ್ಎಸ್) : ಎಲ್ಲರ ಕುತೂಹಲ ಕೆರಳಿಸಿರುವ ಲೋಕಸಭೆ ಚುನಾವಣೆ ಸೋಮವಾರದಿಂದ ಆರಂಭವಾಗಲಿದ್ದು, ಗರಿಷ್ಠ ಮತದಾನಕ್ಕಾಗಿ ಇದೇ ಮೊದಲ ಬಾರಿಗೆ ಚುನಾವಣಾ ಆಯೋಗವು ಮತದಾನದ ಅವಧಿಯನ್ನು ಬೆಳಿಗ್ಗೆ 7ರಿಂದ ಸಂಜೆ 6ರವರೆಗೆ ವಿಸ್ತರಿಸಿದೆ.

ಆದರೆ, ಈಶಾನ್ಯ ಭಾಗದಲ್ಲಿ ಎಂದಿನಂತೆ ಬೆಳಿಗ್ಗೆ 7ರಿಂದ ಸಂಜೆ 5ರವರೆಗೆ ಮತದಾನ ನಡೆಯಲಿದೆ. ಭದ್ರತೆ ದೃಷ್ಟಿಯಿಂದ ಮಣಿಪುರ ಮತ್ತು ನಾಗಾಲ್ಯಾಂಡ್ ನಲ್ಲಿ ಬೆಳಿಗ್ಗೆ 7ರಿಂದ 5ರವರೆಗೆ, ಜಾರ್ಖಂಡ್‌ನ ನಕ್ಸಲ್ ಪೀಡಿತ ಕ್ಷೇತ್ರಗಳಾದ ರಾಜ್‌ಮಹಲ್, ಗೊಡ್ಡ ಮತ್ತು ಧನ್‌ಬಾದ್ ನಲ್ಲಿ ಬೆಳಿಗ್ಗೆ 7ರಿಂದ ಸಂಜೆ 4ರವರೆಗೆ ಮತದಾನ ನಡೆಸಲು ಆಯೋಗ ನಿರ್ಧರಿಸಿದೆ.

ಒಂಬತ್ತು ಹಂತದ ಲೋಕಸಭೆ ಚುನಾವಣೆ ಸೋಮವಾರ ಆರಂಭವಾಗಿ ಮೇ 12ರಂದು ಮುಕ್ತಾಯವಾಗಲಿದೆ. ಮೇ 16ರಂದು ಮತ ಎಣಿಕೆ ನಡೆಯಲಿದೆ.