ಉನ್ನತ ಅಧ್ಯಯನಕ್ಕೆ 12 ವರ್ಷದ ಬೌದ್ಧ ಬಿಕ್ಕು

ಮುಂಡಗೋಡ (ಉತ್ತರ ಕನ್ನಡ ಜಿಲ್ಲೆ): ತಾಲ್ಲೂಕಿನ ಟಿಬೆಟನ್ನರ ಲಾಮಾ ಕ್ಯಾಂಪ್ ನಂ.2ರ ಲೋಸಲಿಂಗ್ ಬೌದ್ಧ ಮಂದಿರದ 12 ವರ್ಷದ ಬೌದ್ಧ ಬಿಕ್ಕು ತೆಂಜಿನ್ ನಾಗವಾಂಗ್ ಜಿಗ್ಮೆ ವಾಂಗಚುಕ್ ಸಹಸ್ರಾರು ಬೌದ್ಧ ಬಿಕ್ಕುಗಳ ಸಮ್ಮುಖದಲ್ಲಿ ಉನ್ನತ ಅಧ್ಯಯನಕ್ಕಾಗಿ ಗುರುವಾರ ಬೌದ್ಧ ಮಂದಿರ ಸೇರ್ಪಡೆಯಾದರು.

2005ರಲ್ಲಿ ಲಡಾಕ್‌ನಲ್ಲಿ ಜನಿಸಿದ ತೆಂಜಿನ್, 19ನೇ ಬಕುಲಾ ರಿನ್‌ಪೋಚೆಯ ಪುನರ್ಜನ್ಮ ಎಂದು ಟಿಬೆಟನ್ನರು ನಂಬಿದ್ದಾರೆ. ಅಂದಿನಿಂದ ಬೌದ್ಧ ಅನುಯಾಯಿಗಳು ವಿಶೇಷ ಆಸಕ್ತಿ, ಭಕ್ತಿಯಿಂದ ನೋಡುತ್ತಿದ್ದ ತೆಂಜಿನ್‌,  ಇಲ್ಲಿನ ಮೊನ್ಯಾಸ್ಟ್ರಿಯಲ್ಲಿ ಪ್ರಾಥಮಿಕ ಶಿಕ್ಷಣ ಪಡೆಯುತ್ತಿದ್ದರು. 12ನೇ ವಯಸ್ಸಿಗೇ ಬೌದ್ಧ ಪಂಡಿತರ ಸರಿಸಮ ಕುಳಿತುಕೊಳ್ಳುವ ಯೋಗ ಪಡೆದುಕೊಂಡಿದ್ದಾರೆ ಎಂದು ಬೌದ್ಧ ಮಂದಿರದ ಮುಖಂಡ ಕೊಂಚೊಕ್‌ ನಂದಕ್‌ ‘ಪ್ರಜಾವಾಣಿ’ಗೆ ತಿಳಿಸಿದರು.

ಜಮ್ಮು ಕಾಶ್ಮೀರದ ಲೇಹ್‌, ಲಡಾಕ್‌ನಿಂದ ಬಂದಿದ್ದ ಬೌದ್ಧ ಅನುಯಾಯಿಗಳು, ಸ್ಥಳೀಯ ಲೋಸಲಿಂಗ್‌ ಬೌದ್ಧ ಮಂದಿರದ ಬಿಕ್ಕುಗಳು ಈ ಸಂದರ್ಭದಲ್ಲಿ ಹಾಜರಿದ್ದರು.