‘ಅರ್ಪಣೆ’ಯನ್ನೂ ಕೈಬಿಡಿ

ಪ್ರಶಾಂತ ಎಂ. ಕುನ್ನೂರ ಅವರು ಬರೆದ,- ‘ಅಕ್ಷರ ಅರಸೊತ್ತಿಗೆ ಬೇಡ’ (ಪ್ರ.ವಾ. ಏ.21) ಎಂಬುದನ್ನು ನಾನೂ ಅನುಮೋದಿಸುತ್ತೇನೆ. ಜೊತೆಗೆ ಅರಸುತನಗಳ ಸಂಬಂಧಪಟ್ಟ ವೈಭವಗಳನ್ನೂ ನಿಷೇಧಿಸಬೇಕೆಂಬುದು ನನ್ನ ಬಯಕೆ.

ನಾಯಕರುಗಳಿಗೆ, ವೈಭವದ  ಸಭೆ ಸಮಾರಂಭಗಳಲ್ಲಿ ಕಿರೀಟಧಾರಣೆ, ಬೆಳ್ಳಿ ಬಂಗಾರಗಳ ಕತ್ತಿ, ಗದೆ ಅರ್ಪಿಸುವುದನ್ನೂ ಕೈ ಬಿಡಬೇಕು.  ಅವು ಗುಲಾಮಗಿರಿಯ ಸಂಕೇತಗಳು. ನಮ್ಮದು ಸೈನ್ಯಾಡಳಿತ ದೇಶವಲ್ಲ; ಪ್ರಜಾರಾಜ್ಯ.

ಇಲ್ಲಿ ಪ್ರಜೆಗಳನ್ನು ಪಾಲಿಸಲು ಇಂತಹ ಸಲಕರಣೆಗಳು ಬೇಕಾಗಿಲ್ಲ.ರಾಕ್ಷಸನನ್ನು ಕೊಂದ ಮುರಾರಿ ಪುರಾರಿಗಳಿಗಿಂತ, ಅಂಗುಲಿಮಾಲನನ್ನು ಗೆದ್ದ ಬುದ್ಧ  ನಮಗೆ ಆದರ್ಶವಾಗಬೇಕು. ಇದನ್ನು, ತಮ್ಮ ತಮ್ಮ ಮುಂದಾಳುಗಳನ್ನು ಆರಾಧಿಸುವ ಎಲ್ಲಾ ಪಕ್ಷದವರೂ ಪಾಲಿಸಬೇಕಾದದ್ದು ಇಂದಿನ ಅವಶ್ಯಕತೆಗಳಲ್ಲಿ ಒಂದು.
-ಡಾ. ಈಶ್ವರ ಶಾಸ್ತ್ರಿ ಮೋಟಿನಸರ, ಶಿರಸಿ