ಬುಲೆಟ್ ಟ್ರೇನ್ ಅಗತ್ಯವೇ?

ಮುಂಬೈನಿಂದ ಅಹಮದಾಬಾದ್‌ವರೆಗೆ ₹ 97.6 ಸಾವಿರ ಕೋಟಿ ಖರ್ಚು ಮಾಡಿ ಬುಲೆಟ್ ಟ್ರೇನ್ ಓಡಿಸುವ ಯೋಜನೆಗೆ ಚಾಲನೆ ನೀಡಲಾಗಿದೆ. ಎಷ್ಟೇ ರಿಯಾಯಿತಿ ಕೊಟ್ಟರೂ ಹಾಕಿದ ಬಂಡವಾಳಕ್ಕೆ ಅನುಗುಣವಾಗಿ ಪ್ರಯಾಣ ದರವನ್ನು ನಿಗದಿ ಮಾಡಲೇಬೇಕಾಗುತ್ತದೆ.

ಆಗ ಬಹುಶಃ ಈ ಬುಲೆಟ್ ರೈಲು ಪ್ರಯಾಣ ದರವು ವಿಮಾನ ದರಗಳ ಹತ್ತಿರವೇ ಇರುವ ಸಂಭವ ಇದೆ. ಇಷ್ಟೊಂದು ಹಣ ಖರ್ಚು ಮಾಡಿ ರೈಲು ಮಾರ್ಗ ನಿರ್ಮಿಸುವ ಬದಲು, ಕಡಿಮೆ ದರದಲ್ಲಿ ವಿಮಾನಯಾನ ಸೇವೆ ಕಲ್ಪಿಸುವುದಕ್ಕೆ ಆದ್ಯತೆ ನೀಡಿದಲ್ಲಿ ಶ್ರಮ, ಹಣ ಉಳಿತಾಯವಾಗುತ್ತದೆ.

ಬಾಹ್ಯಾಕಾಶಕ್ಕೆ ಗಗನಯಾನಿಗಳನ್ನು ಕಳುಹಿಸಲು ಇಸ್ರೊ ₹ 12,500 ಕೋಟಿ ಅನುದಾನ ಕೇಳಿದ್ದಕ್ಕೆ ಪ್ರಧಾನಿಯವರ ಕಚೇರಿ, ಇದರಿಂದ ಏನು ಉಪಯೋಗ ಎಂದು ಪ್ರಶ್ನೆ ಮಾಡಿದೆಯೆಂದು ಮಾಧ್ಯಮಗಳಲ್ಲಿ ವರದಿಯಾಗಿದೆ. ಹಾಗಾದರೆ ಈ ಬುಲೆಟ್ ರೈಲು ಯಾರಿಗೆ? ಇದರಿಂದ ಎಷ್ಟು ಜನರಿಗೆ ಉಪಯೋಗವಾಗುತ್ತದೆ? ಆದ್ಯತೆಗಳ ವಿಮರ್ಶೆಗೆ ಇದು ಸೂಕ್ತ ಕಾಲ. 
-ಡಾ. ಚನ್ನು ಅ. ಹಿರೇಮಠ, ರಾಣೆಬೆನ್ನೂರು