ಮಲಗಿದಂತೆ ನಟಿಸುತ್ತಿರುವ ಆದಾಯ ತೆರಿಗೆ ಇಲಾಖೆ

ಚುನಾವಣೆ ಸಂದರ್ಭದಲ್ಲಿ ಅಭ್ಯರ್ಥಿಗಳು ಘೋಷಿಸಿ­ಕೊಳ್ಳುತ್ತಿರುವ ಆಸ್ತಿಯ ವಿವರ ಎಂಥವ­ರನ್ನೂ ಬೆಚ್ಚಿಬೀಳಿಸದಿರದು.  ಕೆಲವೇ ವರ್ಷಗಳಲ್ಲಿ ದ್ವಿಗುಣಗೊಳ್ಳುತ್ತಿರುವ ಹಣ, ಆಸ್ತಿ ಎಲ್ಲಿಂದ ಬಂತು? ಗಂಡನಿಗಿಂತಲೂ ಅಧಿಕ ಆದಾಯ ಹೊಂದಿರುವ ರಾಜಕೀಯ ಧುರೀಣರ ಹೆಂಡತಿಯರು ಮನೆಯಲ್ಲೇ ಕುಳಿತು ಯಾವ ಕೆಲಸ ಮಾಡಿ ಕೋಟಿಗಟ್ಟಲೆ ಹಣ ಸಂಪಾದಿಸಿದ್ದಾರೆ? ಇವುಗಳನ್ನು ಭೇದಿಸಲು ಆದಾಯ ತೆರಿಗೆ ಇಲಾಖೆಗೆ ಧೈರ್ಯ ಇಲ್ಲವೇ?

ಮಲಗಿದಂತಿದ್ದ ಚುನಾವಣಾ ಆಯೋಗಕ್ಕೆ ಕಾಯಕಲ್ಪ ನೀಡಿದ ಟಿ.ಎನ್‌. ಶೇಷನ್‌ ಅವರಂಥ ಅಧಿಕಾರಿಗಳು ಆದಾಯ ತೆರಿಗೆ ಇಲಾಖೆಗೆ ಬರಬೇಕಿದೆ. ಭ್ರಷ್ಟಾಚಾರದಿಂದ ಬೇಸತ್ತು ಜನ ದಂಗೆ ಏಳುವ ಕಾಲ ಸಮೀಪಿಸುವ ಮೊದಲು ಸಂಬಂಧಪಟ್ಟ ಇಲಾಖೆಗಳು ಎಚ್ಚೆತ್ತುಕೊಳ್ಳಲಿ.