ಉಸಿರುಕಟ್ಟಿ ಈಜಿ ಗಿನ್ನಿಸ್ ದಾಖಲೆ

ವೆನೆಜುವೆಲಾ ಮೂಲದ 41 ವರ್ಷದ ವೃತ್ತಿಪರ ಈಜುಗಾರ ಕಾರ್ಲೋಸ್ ಕಾಸ್ಟ್ 3 ನಿಮಿಷ 5 ಸೆಕೆಂಡ್‌ ಸಮಯದಲ್ಲಿ ನೀರಿನಲ್ಲಿ ಉಸಿರುಗಟ್ಟಿ 177ಮೀಟರ್‌ ಉದ್ದ ಈಜುವ ಮೂಲಕ ಗಿನ್ನಿಸ್ ದಾಖಲೆ ನಿರ್ಮಿಸಿದ್ದಾರೆ.

ನೀರಿನ ಮೇಲ್ಭಾಗದಲ್ಲಿ ಒಮ್ಮೆ ಮಾತ್ರ ಉಸಿರಾಡಿ ನೀರಿನಲ್ಲಿ ಮುಳುಗಿ ಈಜಾಡಲು ಮುಂದಾದ ಕಾರ್ಲೋಸ್ ಕಾಸ್ಟ್, 2010ರಲ್ಲಿ 150 ಮೀಟರ್‌ ಉದ್ದ ಕ್ರಮಿಸಿದ್ದರು. ಈ ಬಾರಿ 177 ಮೀಟರ್‌ ದೂರ ಕ್ರಮಿಸುವ ಮೂಲಕ ತಾವೇ ನಿರ್ಮಿಸಿದ್ದ ದಾಖಲೆಯಲ್ಲಿ ಮುರಿದಿದ್ದಾರೆ.

ಕೈ–ಕಾಲುಗಳಿಗೆ ಈಜು ರೆಕ್ಕೆಗಳು, ಮೂಗಿಗೆ ಕ್ಲಿಪ್‌ ಹಾಗೂ ಕಣ್ಣಿಗೆ ಕನ್ನಡಕ ಹೊರೆತುಪಡಿಸಿ ಕಾರ್ಲೋಸ್ ಕಾಸ್ಟ್ ಯಾವುದೇ ಉಸಿರಾಟದ ಉಪಕರಣಗಳನ್ನು ಬಳಸಿರಲಿಲ್ಲ.

ನೆದರ್‌ಲೆಂಡ್‌ನ ವ್ಯಾಪ್ತಿಯ ಬೊನೈರ್ ಸಮುದ್ರದಲ್ಲಿ ಈ ಪ್ರಯತ್ನವನ್ನು ಮಾಡಿದ್ದಾರೆ. ಇಂಟರ್‌ನ್ಯಾಷನಲ್‌ ಅಸೋಸಿಯೇಷನ್ ಫಾರ್‌ ಡೆವಲಪ್‌ಮೆಂಟ್‌ ಆಫ್‌ ಅಪ್ನಿಯ (ಎಐಡಿಎ) ಪ್ರತಿನಿಧಿಗಳು ಇದಕ್ಕೆ ಸಾಕ್ಷಿಯಾಗಿ ಉಪಸ್ಥಿತರಿದ್ದರು.

‘ಸಮುದ್ರದ ಸಂರಕ್ಷಣೆಯ ಉದ್ದೇಶದೊಂದಿಗೆ ಸಮುದ್ರದ ಆಳದಲ್ಲಿ ಈಜುವ ಸ್ಫರ್ಧೆಯನ್ನು ಏರ್ಪಡಿಸಿ ವಿಶೇಷ ದಾಖಲೆಯನ್ನು ನಿರ್ಮಿಸಲು ಬಯಸಿದ್ದೇವೆ’ ಎಂದು ಕಾರ್ಲೋಸ್ ಕಾಸ್ಟ್ ವಿವರಿಸಿದ್ದಾರೆ.

ಯುಟ್ಯೂಬ್‌ನಲ್ಲಿ ಕಾರ್ಲೋಸ್ ಕಾಸ್ಟ್ ಅವರ ಸಾಹಸಮಯ ವಿಡಿಯೊವನ್ನು ಈವರೆಗೆ 77,320 ಮಂದಿ ವೀಕ್ಷಿಸಿದ್ದಾರೆ.