ಆರ್ಚರಿ ಸಂಸ್ಥೆ: ಪರಿಶೀಲನೆಗೆ ಸೂಚನೆ

ನವದೆಹಲಿ: ರಾಷ್ಟ್ರೀಯ ಕ್ರೀಡಾ ಅಭಿವೃದ್ಧಿ ನೀತಿಯಡಿ ಆರ್ಚರಿ ಸಂಸ್ಥೆಯು (ಎಎಐ) ತನ್ನ ನಿಯಮಾವಳಿಗಳಿಗೆ ತಿದ್ದುಪಡಿ ತಂದಿದೆಯೇ ಇಲ್ಲವೇ ಎಂಬುದನ್ನು ಪರಿಶೀಲಿಸುವಂತೆ ಸುಪ್ರೀಂ ಕೋರ್ಟ್‌ ಕೇಂದ್ರ ಸರ್ಕಾರಕ್ಕೆ ಸೋಮವಾರ ಸೂಚಿಸಿದೆ.

ಸಂಸ್ಥೆಯ ಕಾರ್ಯಯೋಜನೆಗಳ ಮೇಲೆ ಕಣ್ಣಿಡು ವಂತೆ ದೆಹಲಿ ಹೈಕೋರ್ಟ್‌ ಮಾಜಿ ಮುಖ್ಯ ಚುನಾವಣಾ ಆಯುಕ್ತ ಎಸ್‌.ವೈ.ಖುರೇಷಿ ಅವರನ್ನು ಕಳೆದ ಆಗಸ್ಟ್‌ ನಲ್ಲಿ ನೇಮಕ ಮಾಡಿರುವುದನ್ನು ಪ್ರಶ್ನಿಸಿ ಎಎಐ ಸಲ್ಲಿಸಿದ್ದ ಅರ್ಜಿಯ ವಿಚಾರಣೆ ಸಂದರ್ಭದಲ್ಲಿ ಈ ಸೂಚನೆ ನೀಡಿದೆ. ಸಂಸ್ಥೆಯ ಮಾನ್ಯತೆಯನ್ನು 2012ರಲ್ಲಿ ಸರ್ಕಾರ ನವೀಕರಿಸಿತ್ತು.