ಚಂದ ಪದ್ಯ
ಪುಟ್ಟ: ರಾತ್ರಿ ಒಂದು ಕನಸು ಕಂಡೆ
ಅಮ್ಮ ಕೇಳು, ಹೇಳುವೆ
ಹುಲಿಯ ಕಂಡೆ ಕನಸಿನಲ್ಲಿ
ಕೇಳು ಅಮ್ಮ ಸ್ವಲ್ಪವೇ
ಅಮ್ಮ: ಮೃಗಾಲಯಕ್ಕೆ ಹೋದೆಯೇನೊ
ಕನಸಿನಲ್ಲಿ ಒಬ್ಬನೇ?
ಹೇಗೆ ಇತ್ತು ಕಂಡ ಹುಲಿಯು
ಹೇಳೊ ಪುಟ್ಟ ಬೇಗನೆ
ಪುಟ್ಟ: ದಾರಿಯಲ್ಲಿ ಕಂಡೆ ಅಮ್ಮ
ಪಟ್ಟೆ ಪಟ್ಟೆ ಹುಲಿಯನು!
ನನ್ನ ಎದುರೆ ಬರುತ್ತಿತ್ತು
ನೋಡುತ್ತಿತ್ತು ನನ್ನನ್ನು!
ಅಮ್ಮ: ದಾಟಿ ಮುಂದೆ ಹೋಯಿತೇನು
ನೀನು `ಹಲೋ~ ಅಂದೆಯಾ?
ಹುಲಿಯು ಬಂತು ಎಂದು ಅಲ್ಲೆ
ಮರಕೆ ಹತ್ತಿ ಕುಳಿತೆಯಾ?
ಪುಟ್ಟ: ದೊಡ್ಡ ಹುಲಿ ನನ್ನ ನೋಡಿ
ನಡೆಯಲಿಲ್ಲ, ನಿಂತಿತು!
ಎಲ್ಲ ಹಲ್ಲು ತೋರಿಸುತ್ತ
ಘ್ರಾ ಎಂದು ಕೂಗಿತು!
ಅಮ್ಮ: ಮೃಗಾಲಯದಿ ಹುಲಿಯ ನೋಡಿ
ಅದರ ಕನಸೆ ಬಿದ್ದಿದೆ
ನೀನು ಹೆದರಿಕೊಂಡೆ, ಗೊತ್ತು,
ಚಡ್ಡಿ ಒದ್ದೆಯಾಗಿದೆ!
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.