ತುಡುಕದಿರು ಜೀವವ

ಪ್ರಭುವೆ
ನನಗೀಗ ಅರ್ಥವಾಗುತ್ತಿದೆ
ಶಬ್ದಾರ್ಥಗಳಾಚೆ
ಮಿಂಚಿ ಹೋದೊಂದು ಮೌನ

ಹೂವು ಘಮ ಘಮಿಸಿ
ಪರಿಮಳದ ದಿವ್ಯ ದರ್ಶನದಲ್ಲಿ
ಮುಚ್ಚದ ಕಣ್ಣೆವೆಗಳಲ್ಲಿ
ಹೂವೇ ಕಾಣೆಯಾದ ಪರಿಯಂತೆ...

ಪರ್ವತದೆದೆಯ
ಒಳ ಗವಿಯ ಗವಿಯಲ್ಲಿ
ಇಷ್ಟಲಿಂಗದ ಜ್ಯೋತಿ
ಬೆಳಗಿದ ಬೆಳಗೊಂದು
ಒಳ ಒಳಗೆ ಇಳಿದಂತೆ...

ಪಾಕದೊಳಗೊಂದು ರುಚಿ
ಹೊಕ್ಕು
ರಸನದ ಅಂಗಳದಲ್ಲಿ
ರಸದ ಬಾವಿಯ ತುಡುಕದಂತೆ

ಅದೋ
ಅಲ್ಲಿ
ತುಸು ದೂರದಲ್ಲಿ
ಮುಗಿದ ಕರದೊಳಗೊಂದು
ಏನೂ ಇರದ ಸ್ಥಿತಿಯೆಂಬ ನಿರಾಳ

ಉಸಿರು ನಿಂತರೂ ಉಸಿರಾಡುವ
ಲೀಲೆಯೊಳಗೆ
ಅರ್ಥಾಂತರದ ಭಾಷಾಂತರ–
ವೊಂದು
ಈಗಲೀಗ ಈ ಘಳಿಗೆಯಲ್ಲಿ
ಘಟಿಸುತ್ತಿರುವುದಲ್ಲಾ...!

ಪ್ರಭುವೆ
ಬೈಯದಿರು; ದುಡುಕದಿರು
ತುಡುಕದಿರು
ಎನ್ನ ಪ್ರಾಣಲಿಂಗದ ತುದಿಗೆ
ಆತು; ಜೋತು ಬಿದ್ದ ಜೀವವ.