ಮಳೆ ಬಂದು ನಿಂತಾಗ

ಮಳೆ ಬಂದು ನಿಂತಾಗ

ಹಸಿರುಕ್ಕಿ ಹರಿವಾಗ

ಹಸಿರುಟ್ಟು ಭೂರಮೆಯ

ನೋಡಲೆನಿತು ಸೊಗಸು!

ತಂಪಾದ ಹವೆಯಲ್ಲಿ

ಪಶ್ಚಿಮದ ಬಾನಲ್ಲಿ

ಬಣ್ಣಬಣ್ಣದ ತುಣುಕು

ಇಂದ್ರ ಧನಸ್ಸು!

ತಂಗಾಳಿ ಬೀಸುತಿರೆ

ಜೋಗುಳವ ಹಾಡುತಿರೆ

ಗಿಳಿಮರಿಗೆ ಕುಳಿತಲ್ಲೇ

ನಿದ್ದೆ ಜೋಂಪು!

ತೆಂಗು ಗರಿಗಳ ನಡುವೆ

ಕುಳಿತ ಕೋಗಿಲೆ ಹಾಡು

ದಾರಿಹೋಕರ ಕಿವಿಗೆ

ಎನಿತು ಇಂಪು!

ಕೂಗಳತೆ ದೂರದಲ್ಲಿ

ಮಾಂದಳಿರ ತೋಪಿನಲಿ

ನೀಲಿ ಹರಿಸಿನ ನವಿಲ

ಕೇಕೆ ಕೂಗು!

ಹುಲ್ಲುಗರಿಗಳ ಮೇಲೆ

ನೀರಹನಿ ಮಿನುಗಿರಲು

ಸಗ್ಗವೇ ಧರೆಗಿಳಿದ

ಊರ ಬಯಲು!

ಹಸಿರು ಎಲೆಗಳ ನಡುವೆ

ಹಸಿರು ಹಾವದು ಹರಿದು

ಬಿದ್ದ ಬಿಸಿಲಿಗೆ

ಫಳಫಳನೆ ಹೊಳೆಯುತಿದೆ!

ಮಳೆನಿಂತು ಎಳೆಬಿಸಿಲು

ಎಲ್ಲೆಡೆಗೆ ಸುರಿದಿರಲು

ಚಂಗನೆಯ ಎಳೆಗರು

ನೆಗೆದಾಡಿದೆ!

ಸುರಿದ ಮಳೆಯದು

ನಿಂತುದನು ಕಾಣುತ್ತ

ಹಿಡಿದ ಕೊಡೆಗಳ ಮುದುರಿ

ನಡೆದಿರುವ ಜನರು

ಗುಡಿಸಿಲೊಳಗೆಲ್ಲ

ನಿಂತ ನೀರನು

ಜನರು ಮೊಗೆಮೊಗೆದು

ಮನೆ ಹೊರಗೆ ಚೆಲ್ಲುತಿಹರು

ಮಳೆ ನಿಂತುದನು ಕಂಡು

ಮನೆಯಲ್ಲಿ ಗಡಿಬಿಡಿ

ಮಕ್ಕಳನ್ನು ಶಾಲೆಗೆ

ಕಳಿಸಿಕೊಡಲೆಂದು

ಹತ್ತಿರದ ಶಾಲೆಯಲಿ

ಮೊಳಗೊ ಗಂಟೆಯ ಸದ್ದು

ಕಿರಿಕಿರಿಯ ಮೊಮ್ಮಗುವಿಗೆ

ಬಿತ್ತು ಬೆನ್ನಿಗೆ ಗುದ್ದು!