ಹಾಗಾಗದಿರಲಿ

ಮನೆಯೆಲ್ಲ ಅಸ್ತವ್ಯಸ್ತ

ನಿಮಗೆ ನೀಟಾಗಿ ಇಡಲು ಗೊತ್ತಿಲ್ಲ
ನೀವೆಂಥ ಮನುಷ್ಯರೊ
ಹೆಂಡತಿಯ ಗೊಣಗಾಟ
ನನ್ನಲ್ಲಿ ಮಾತ್ರವಲ್ಲ ಮಕ್ಕಳಲ್ಲೂ

ಎಲ್ಲಿದೆ ಅಚ್ಚುಕಟ್ಟು ನಿಸರ್ಗದಲ್ಲಿ
ಅಸ್ತವ್ಯಸ್ತವೇ ಚೆಂದ
ಜೀವಜಾಲದ ಸ್ವಚ್ಛಂದ
ಅಭಯಾರಣ್ಯದ ಪ್ರ-ಬಂಧ

ನೀನು ವೈನಾಗಿ ಬೈತಲೆಹಾಕಿ ಜಡೆ ನೇಯ್ದು
ಪಾವಲಿ ಸಿಂಧೂರ ಇಟ್ಟು
ಮೈತುಂಬ ಸೀರೆಯುಟ್ಟು
ಮುಖತುಂಬ ಸಿಂಗಾರವಾಗಿ
ಇರುವುದು ನನಗಿಷ್ಟವಿಲ್ಲ ಗರತಿಯಾಗಿ

ತುಟಿವರೆಗೂ ಬಂದ ಮಾತು ತಡೆದಿತ್ತು
ಮನೆಯಂದ ಚೆಂದಕಾಗಿ
ನೆಂಟರಿಷ್ಟರಿಂದ ಹೊಗಳಿಸಿಕೊಳ್ಳುವುದು
ಆಕೆಗೆ ಮಾಮೂಲು
ಒಂದಿರುವೆ ಕಂಡರೂ
ಗುಡಿಸಿ ಹಾಕುವಳು

ಸಣ್ಣವನಿರುವಾಗ ನಾನು
ಅಮ್ಮನೂ ಹಾಗೆ
ತುಂಬ ಕಟ್ಟುನಿಟ್ಟು
ಇಟ್ಟಲ್ಲಿ ಇಡದಿದ್ದರೆ ಬಟ್ಟೆ ವಸ್ತು
ಬೈದೇ ಬಿಡುವಳು ಆಗುವವರೆಗೆ ಸುಸ್ತು

ಅದೇ ಗೀಳುರೋಗವಾಗಿ
ಅಮ್ಮ ಬದುಕಿರುವವರೆಗೂ
ಓ  ದೇವರೇ
ನನ್ನವಳು ಹಾಗಾಗದಿರಲಿ
ಮಕ್ಕಳಿಗೆ ಅಸ್ತವ್ಯಸ್ತವೇ ಪ್ರಿಯವಾಗಲಿ