ಸೂಚ್ಯಂಕ: ಶೇ 1.82ರಷ್ಟು ಏರಿಕೆ

ಮುಂಬೈ (ಪಿಟಿಐ): ವಾರದ ವಹಿವಾಟಿನಲ್ಲಿ ಮುಂಬೈ ಷೇರುಪೇಟೆ ಸಂವೇದಿ ಸೂಚ್ಯಂಕವು ಶೇಕಡ1.82ರಷ್ಟು ಏರಿಕೆ ಕಂಡಿದ್ದು, ಶನಿವಾರ 19,864 ಅಂಶಗಳಿಗೆ ವಹಿವಾಟು ಕೊನೆಗೊಳಿಸಿತು. ರಾಷ್ಟ್ರೀಯ ಷೇರು ಪೇಟೆ ‘ನಿಫ್ಟಿ’ ಕೂಡ ಶೇಕಡ 1.56ರಷ್ಟು ಏರಿಕೆ ಕಂಡು 5,948 ಅಂಶಗಳಿಗೆ ವಹಿವಾಟು ಕೊನೆಗೊಳಿಸಿತು.

ವಾರದ ವಹಿವಾಟಿನಲ್ಲಿ ‘ವಿಪ್ರೊ’ ಶೇಕಡ 7.8, ‘ಎಸಿಸಿ’ ಶೇಕಡ 5.7, ‘ಟಿಸಿಎಸ್’ 5.5 ಮತ್ತು ‘ಟಾಟಾ ಸ್ಟೀಲ್’ 4.9ರಷ್ಟು ಏರಿಕೆ ಕಂಡು ಲಾಭ ಮಾಡಿಕೊಂಡವು. ಇದೇ ವೇಳೆ, ‘ಎಂಆ್ಯಂಡ್‌ಎಂ’ ಶೇಕಡ 7.3, ‘ಹೀರೊ ಹೋಂಡಾ’ 4.6, ‘ಎಚ್‌ಡಿಎಫ್‌ಸಿ’ ಶೇಕಡ 3.5ರಷ್ಟು ಕುಸಿತ ಕಂಡವು. ವಾರದ ವಹಿವಾಟಿನಲ್ಲಿ ಮುಂಬೈ ಷೇರುಪೇಟೆ ಸಾಂಸ್ಥಿಕ ಹೂಡಿಕೆ ಒತ್ತಡವನ್ನು ಎದುರಿಸಬೇಕಾಯಿತು. ಭಾರತೀಯ ಷೇರುಪೇಟೆ ನಿಯಂತ್ರಣ ಮಂಡಳಿ (ಸೆಬಿ) ಅಂಕಿ ಅಂಶದಂತೆ ಸಾಂಸ್ಥಿಕ ಹೂಡಿಕೆದಾರರು ಈ ವಾರದಲ್ಲಿ 247.4 ದಶಲಕ್ಷ ಡಾಲರ್ ವಹಿವಾಟು ದಾಖಲಿಸಿದರು.