ಷೇರು ಮಾರುಕಟ್ಟೆ, ರೂಪಾಯಿ ಮೌಲ್ಯ ಕುಸಿತ

ಬೆಂಗಳೂರು: ಭಾರತೀಯ ವಾಯುಪಡೆಯ ಯುದ್ಧ ವಿಮಾನಗಳು ಪಾಕ್ ಮೇಲೆ ವಾಯುದಾಳಿ ನಡೆಸಿದ ಸುದ್ದಿ ಹರಡುತ್ತಿದ್ದ ಬೆನ್ನಲ್ಲೇ ಷೇರು ಮಾರುಕಟ್ಟೆ ಕುಸಿತ ಕಂಡಿದೆ. ರೂಪಾಯಿ ಮೌಲ್ಯವೂ ಕುಸಿದಿದ್ದು ವಹಿವಾಟುದಾರರಲ್ಲಿ ಆತಂಕ ಮೂಡಿದೆ.

ಬೆಳಿಗ್ಗೆ 9 ಗಂಟೆಗೆ ಮಾರುಕಟ್ಟೆ ಆರಂಭವಾಗುವ ಮೊದಲೇ ವೈಮಾನಿಕ ದಾಳಿಯ ಬಗ್ಗೆ ಪ್ರಮುಖ ಜಾಲತಾಣಗಳಲ್ಲಿ ವರದಿ ಪ್ರಕಟವಾಗಿತ್ತು. ರಾಷ್ಟ್ರೀಯ ಸೂಚ್ಯಂಕ(ನಿಫ್ಟಿ)35.60 ಅಂಶಗಳ ಕುಸಿತದೊಂದಿಗೆ (10,844 ಅಂಶ) ದಿನದ ವಹಿವಾಟು ಆರಂಭಿಸಿದರೆ, ಮುಂಬೈ ಷೇರುಪೇಟೆಯು (ಸೆನ್ಸೆಕ್ಸ್) 123.65 ಅಂಶಗಳ ಕುಸಿತದೊಂದಿಗೆ (35,089) ವಹಿವಾಟು ಆರಂಭಿಸಿತು.

ವಹಿವಾಟು ಆರಂಭಗೊಂಡ ಮೊದಲ ಕೆಲ ನಿಮಿಷಗಳಲ್ಲಿಯೇ ನಿಫ್ಟಿ 139.90 (10740) ಮತ್ತು ಸೆನ್ಸೆಕ್ಸ್ 460.18 (35753.20) ಅಂಶಗಳನ್ನು ಕಳೆದುಕೊಂಡಿತು. ಆಟೊಮೊಬೈಲ್, ಬ್ಯಾಂಕಿಂಗ್, ಇಂಧನ, ಗ್ರಾಹಕ ಉಪಯೋಗಿ ವಸ್ತುಗಳು, ಮೂಲಸೌಕರ್ಯ ಕಂಪನಿಗಳು, ಖನಿಜ, ಔಷಧಿ ಸೇರಿದಂತೆ ಬಹುತೇಕ ಎಲ್ಲ ವಲಯದ ಷೇರುಗಳಮೌಲ್ಯವು ಕುಸಿಯುತ್ತಿದೆ.

ರೂಪಾಯಿ ಮೌಲ್ಯ ಕುಸಿತ:ಡಾಲರ್ ಎದುರುರೂಪಾಯಿ ಮೌಲ್ಯವು 28 ಪೈಸೆಗಳಷ್ಟು ಕುಸಿತ ಕಂಡಿದೆ. ಡಾಲರ್ ಮೊತ್ತವು ₹71.26 ಮುಟ್ಟಿದೆ.