ಹಳಕಟ್ಟಿಯವರ ಕೊಡುಗೆ ಅಪಾರ: ಉಪನ್ಯಾಸಕ ಸುರೇಶ

ಗುಳೇದಗುಡ್ಡ: ಡಾ.ಫ.ಗು.ಹಳಕಟ್ಟಿಯವರು ನಿರ್ಲಕ್ಷಕ್ಕೆ ಒಳಗಾಗಿದ್ದ ವಚನ ಸಾಹಿತ್ಯವನ್ನು ಸಂರಕ್ಷಣೆ ಮಾಡಿ ಮನುಕುಲಕ್ಕೆ ಅರ್ಪಿಸಿದ ಮಹಾನ್ ಚೇತನ. ವಚನ ಸಾಹಿತ್ಯಕ್ಕೆ ಹಳಕಟ್ಟಿಯವರ ಕೊಡುಗೆ ಅಪಾರವಾಗಿದೆ ಎಂದು ಉಪನ್ಯಾಸಕ ಸುರೇಶ ರಾಜನಾಳ ಹೇಳಿದರು.

ಪಟ್ಟಣದ ನಿವೃತ್ತ ಶಿಕ್ಷಣಾಧಿಕಾರಿ ಎಚ್.ಎಸ್.ಹುಳಪಲ್ಲೇದ ಅವರ ನಿವಾಸದಲ್ಲಿ ಬಸವ ಕೇಂದ್ರದ ಆಶ್ರಯದಲ್ಲಿ ಶನಿವಾರ ಆಯೋಜಿಸಿದ್ದ ಮನೆಯಲ್ಲಿ ಮಹಾಮನೆ ಕಾರ್ಯಕ್ರಮ ಹಾಗೂ ಫ.ಗು.ಹಳಕಟ್ಟಿ ಅವರ ಜಯಂತಿ ಕಾರ್ಯಕ್ರಮದಲ್ಲಿ ಮಾತನಾಡಿದರು.

ತಾಳೆಗರಿ, ಕೈಬರಹದಲ್ಲಿ ಇದ್ದ ವಚನ ಸಾಹಿತ್ಯವನ್ನು ಸಂಶೋಧಿಸಿ ಗ್ರಂಥ ರೂಪಕ್ಕೆ ತಂದುಕೊಟ್ಟ ಫ.ಗು.ಹಳಕಟ್ಟಿ ಅವರ ಬದುಕು ನಮಗೆಲ್ಲ ಸ್ಪೂರ್ತಿಯಾಗಿದೆ. ಫ.ಗು. ಹಳಕಟ್ಟಿಯವರ ವಚನ ಸಾಹಿತ್ಯ ಅಧ್ಯಯನ ಮಾಡಿ ಅವರ ಜೀವನದ ಕೆಲವು ಅಂಶಗಳನ್ನು ಬದುಕಿನಲ್ಲಿ ಅಳವಡಿಸಿಕೊಂಡಾಗ ಮಾತ್ರ ಅವರ ಜಯಂತಿ ಆಚರಣೆ ಸಾರ್ಥಕವಾಗುತ್ತದೆ ಎಂದರು.

ನಿವೃತ್ತ ಪ್ರಾಧ್ಯಾಪಕ, ಸಾಹಿತಿ ಮಹಾದೇವಯ್ಯ ನೀಲಕಂಠಮಠ ಮಾತನಾಡಿ, ಫ.ಗು.ಹಳಕಟ್ಟಿ ಈ ಲೋಕದ ಮರೆಯ ಮಾಣಿಕ್ಯ. ಅವರು ವಚನ ಸಾಹಿತ್ಯವನ್ನು ಜೀವಂತವಾಗಿಸಿದ್ದಾರೆ. ಶ್ರೀಮಂತ ವಚನ ಸಾಹಿತ್ಯವನ್ನು ನಾವೆಲ್ಲ ನಿತ್ಯ ಜೀವನದಲ್ಲಿ ಅನುಸರಿಸಬೇಕಾಗಿದೆ ಎಂದು ಹೇಳಿದರು.

ವಚನ ಪಿತಾಮಹ ಡಾ.ಫ.ಗು.ಹಳಕಟ್ಟಿ ಅವರ ಭಾವಚಿತ್ರಕ್ಕೆ ಪೂಜೆ ಸಲ್ಲಿಸಲಾಯಿತು. ಅಲ್ಲದೇ ಅವರ 15 ಸಂಪುಟಗಳ ವಚನ ಸಾಹಿತ್ಯದ ಗ್ರಂಥಗಳನ್ನು ಪ್ರದರ್ಶಿಸಲಾಯಿತು. ಶ್ರೀಕಾಂತ ಗಡೇದ ಬಸವಣ್ಣನವರ ಕುರಿತು ಮಾತನಾಡಿದರು.

ಎಚ್.ಎಸ್.ಹುಳಪಲ್ಲೇದ, ರಾಚಣ್ಣ ಕೆರೂರ, ಮುರುಗೇಶ ಶೇಖಾ, ಸಂಗಮೇಶ ಹುಳಪಲ್ಲೇದ, ಪುತ್ರಪ್ಪ ಬೀಳಗಿ, ಮಲ್ಲಿಕಾರ್ಜುನ ರಾಜನಾಳ, ಮಹಾಂತೇಶ ಸಿಂದಗಿ, ಚಂದ್ರಶೇಖರ ತೆಗ್ಗಿ, ನಿರ್ಮಲಾ ಬರಗುಂಡಿ, ಶ್ರೀದೇವಿ ಶೇಖಾ, ಜಯಶ್ರೀ ಬರಗುಂಡಿ, ಬಸವರಾಜ ಇಲಾಳಶೆಟ್ಟರ, ಗೀತಾ ತಿಪ್ಪಾ, ಗಾಯಿತ್ರಿ ಕಲ್ಯಾಣಿ, ಬಸವರಾಜ ಕಂಬಾಳಿಮಠ, ಸುರೇಖಾ ಗೆದ್ದಲಮರಿ ಇತರರು ಇದ್ದರು.