‘ಹೈದ್ರಾಬಾದ್ ರೈಲು ಬಾಗಲಕೋಟೆಯವರೆಗೆ ವಿಸ್ತರಿಸಿ’

ಗುಳೇದಗುಡ್ಡ: ಬಾಗಲಕೋಟೆಯ ಜನರು ಹೈದ್ರಾಬಾದ್‌ವರೆಗೆ ವ್ಯಾಪಾರ ವಹಿವಾಟು ಮಾಡುತ್ತಿದ್ದಾರೆ. ಇವರ ಅನುಕೂಲಕ್ಕಾಗಿ  ವಿಜಯಪುರ ಹೈದ್ರಾಬಾದ್ ರೈಲನ್ನು ಬಾಗಲಕೋಟೆಯವರೆಗೆ ವಿಸ್ತರಿಸಬೇಕೆಂದು ರೈಲ್ವೆ ಸಚಿವ ವಿ.ಸೋಮಣ್ಣ ಅವರಿಗೆ  ಮಾಜಿ ಶಾಸಕ ರಾಜಶೇಖರ ಶೀಲವಂತ ಮನವಿ ಮಾಡಿದರು.

ಅವರು ಇತ್ತೀಚೆಗೆ ವಿ.ಸೋಮಣ್ಣ ಅವರನ್ನು ಭೇಟಿ ಮಾಡಿ, ‘ಈ ರೈಲನ್ನು ವಿಸ್ತರಿಸಿದರೆ ಇಲ್ಲಿನ ಜನರಿಗೆ ವ್ಯಾಪಾರ ಮಾಡಲು ಅನುಕೂಲವಾಗುತ್ತದೆ. ಅಲ್ಲದೇ, ಜನರಿಗೆ  ಓಡಾಡಲೂ ನೆರವಾಗಲಿದೆ. ಆದಷ್ಟು ಬೇಗನೇ ಸಂಬಂಧಿಸಿದ ಅಧಿಕಾರಿಗಳಿಗೆ ಸೂಚಿಸಬೇಕು‘ ಎಂದು ಮನವಿ ಪತ್ರದ ಮೂಲಕ ಕೋರಿದರು.