ಸಿರುಗುಪ್ಪ ತಾಲ್ಲೂಕಿನ ವಿವಿಧೆಡೆ ಮಳೆ: ತುಂಬಿ ಹರಿದ ಹಳ್ಳ

ಸಿರುಗುಪ್ಪ: ತಾಲ್ಲೂಕಿನ ವಿವಿಧೆಡೆ ಶನಿವಾರ ಉತ್ತಮ ಮಳೆ ಸುರಿದಿದ್ದು, 64 ಹಳೆಕೋಟೆ ಗ್ರಾಮದ ಮಾರೆಮ್ಮ ದೇವಸ್ಥಾನದ ಹಿಂದಿನ ಹಳ್ಳ ಹಾಗೂ ಶಾಲಿಗನೂರು ಗ್ರಾಮದ ಹತ್ತಿರದ ಹಳ್ಳವು ತುಂಬಿ ಕಿರು ಸೇತುವೆ ಮೇಲೆ ನೀರು ಹರಿಯಿತು.

64ಹಳೆಕೋಟೆ ಗ್ರಾಮದ 5ನೇ ವಾರ್ಡ್‌ ರಸ್ತೆ ಮೇಲೆ ನೀರು ಹರಿದಿದ್ದರಿಂದ ಸಂಚಾರ ಅಸ್ತವ್ಯಸ್ತವಾಗಿತ್ತು. ಶಾಲಿಗನೂರು ಗ್ರಾಮದಿಂದ ಕೆ. ಬೆಳಗಲ್‌ ಗ್ರಾಮಕ್ಕೆ ಸಂಪರ್ಕ ಕಲ್ಪಿಸುವ ಕಿರು ಸೇತುವೆ ಮೇಲೆಯೂ ಕೆಲ ತಾಸು ಸಂಚಾರ ಸ್ಥಗಿತವಾಗಿತ್ತು. ಇದರಿಂದ ಬಂಡ್ರಾಳ, ಕೆ. ಸೂಗೂರು, ಮುದೇನೂರು, ಕೆ. ಬೆಳಗಲ್‌ ಗ್ರಾಮಕ್ಕೆ ಸಂಪರ್ಕ ಕಡಿತಗೊಂಡಿತ್ತು.

ಈ ಹಳ್ಳಕ್ಕೆ ಎತ್ತರದ ಸೇತುವೆ ನಿರ್ಮಿಸುವಂತೆ ಗುರುಸ್ವಾಮಿ, ಸೋಮಯ್ಯ, ಚೆನ್ನನಗೌಡ ಒತ್ತಾಯಿಸಿದರು.