ಪಿತೃಪಕ್ಷ ಆರಂಭ | ಹೂ ಬೆಲೆ ಕುಸಿತ: ಕಂಗಲಾದ ಹೂ ಬೆಳೆಗಾರರು

ವಿಜಯಪುರ (ದೇವನಹಳ್ಳಿ): ವರಮಹಾಲಕ್ಷ್ಮಿ, ಗೌರಿ ಗಣೇಶ ಹಬ್ಬಕ್ಕೆ ಮಾರುಕಟ್ಟೆಯಲ್ಲಿ ಬಲು ದುಬಾರಿಯಾಗಿದ್ದ ಹೂವಿನ ಬೆಲೆ ಪಿತೃಪಕ್ಷ ಆರಂಭದ ಬಳಿಕ ಕುಸಿದಿದ್ದು, ಹೂ ಬೆಳೆಗಾರರು ಸಂಕಷ್ಟಕ್ಕೆ ಸಿಲುಕಿದ್ದಾರೆ.

ಸೆ.7ರಿಂದ ಪಿತೃ ಪಕ್ಷ ಆರಂಭಗೊಂಡಿದೆ. ಈ ಸಮಯದಲ್ಲಿ ಮದುವೆ, ನಾಮಕಾರಣ, ಗೃಹಪ್ರವೇಶ ಇತರೆ ಶುಭ ಕಾರ್ಯಗಳು ಹೆಚ್ಚು ನಡೆಯುವುದಿಲ್ಲ. ಹೀಗಾಗಿ ಸ್ಥಳೀಯವಾಗಿ ಬೆಳೆದ ಹೂವಿಗೆ ಬೇಡಿಕೆ ಕಡಿಮೆ ಆಗಿರುವುದರಿಂದ ಬೆಲೆ ಕುಸಿದಿದೆ.

ನೆರೆಯ ರಾಜ್ಯ, ಜಿಲ್ಲೆಗಳಲ್ಲಿಯೂ ಹೂವಿಗೆ ಸೂಕ್ತ ಬೇಡಿಕೆಯೂ ಸಹ ಇಲ್ಲದಿರುವುದರಿಂದ ಜಿಲ್ಲೆಯಿಂದ ಹೆಚ್ಚಿನ ಪ್ರಮಾಣದಲ್ಲಿ ಹೂವು ರಫ್ತು ಆಗುತ್ತಿಲ್ಲ. ಇದೇ ಬೆಲೆ ಕುಸಿತಕ್ಕೆ ಪ್ರಮುಖ ಕಾರಣ ಎನ್ನುತ್ತಾರೆ ಹೂವಿನ ವ್ಯಾಪಾರಿಗಳು.

ಕಳೆದ ವಾರದ ಹಿಂದೆಯಷ್ಟೇ ಗಗನ ಕುಸುಮವಾಗಿದ್ದ ಹೂವಿನ ಬೆಲೆ ಈಗ ಪಾತಾಳ ಸೇರಿದೆ. ಸದ್ಯ ಮಾರುಕಟ್ಟೆಯಲ್ಲಿ ಹೂವಿನ ದರವು ಗಣನೀಯ ಕುಸಿತ ಆಗಿರುವುದು ದೇವರ ಮುಡಿಗೆ ಸೇರಬೇಕಾದ ಹೂ ತಿಪ್ಪೆಯ ಪಾಲಾಗುತ್ತಿದೆ. ತೋಟದಲ್ಲಿ ಹೂ ಕಿತ್ತ ಕೂಲಿ ಹಣವು ಕೈಗೆ ಸಿಗದೆ ರೈತರು ಹೆಚ್ಚು ನಷ್ಟ ಅನುಭವಿಸುತ್ತಿದ್ದಾರೆ.

ಹೂಗಿಂತ ಬ್ಯಾಗ್ ಬೆಲೆ ದುಬಾರಿ: ಈಗ ಹೂವಿಗಿಂತ ಅದನ್ನು ಸಾಗಿಸಲು ಬಳಸುವ ಬ್ಯಾಗ್ ಬೆಲೆಯೇ ದುಬಾರಿಯಾಗಿರುವ ಪರಿಸ್ಥಿತಿಯು ನಿರ್ಮಾಣವಾಗಿದೆ. ಪ್ರತಿ ಕೆ.ಜಿಗೆ ನೂರಾರು ರೂಗಳಿಗೆ ಮಾರಾಟವಾಗುತ್ತಿದ್ದ ಗುಲಾಬಿ ಹೂ ಈಗ ಕೇವಲ ₹20 ರಿಂದ ₹30 ಆಸುಪಾಸಿದೆ. ಹೂ ತುಂಬುವ ಬ್ಯಾಗ್ ಬೆಲೆಯೇ ₹20 ಇದೆ.

ಇನ್ನೂ ಸೇವಂತಿಗೆ ₹20 ರಿಂದ ₹30 ಮಾರಾಟವಾದರೆ, ಚೆಂಡು ಹೂ ₹5ಗೆ ಸಿಗುತ್ತಿದೆ. 30 ಕೆ.ಜಿಯ ಸೇವಂತಿ, ಚೆಂಡೂ ಹೂವಿನ ಬ್ಯಾಗ್ ಕೇವಲ ₹20-30ಗೆ ಬಿಕರಿಯಾಗುತ್ತಿದೆ. ಇದರಿಂದ ಲಕ್ಷಾಂತರ ರೂ ವ್ಯಯಿಸಿ ಹೂವು ಬೆಳೆದ ರೈತರಿಗೆ ಪಿತೃ ಪಕ್ಷದ ಆರಂಭ ಭಾರೀ ಹೊಡೆತ ನೀಡಿದೆ.