ಹೊಸಕೋಟೆ | ಕೆರೆಗಳಲ್ಲಿ ಅಕ್ರಮ ಮಣ್ಣು ಸಾಗಣೆ ಅವ್ಯಾಹತ

ಹೊಸಕೋಟೆ: ತಾಲ್ಲೂಕಿನ ಕೆರೆಗಳಲ್ಲಿ ಅನುಮತಿ ಇಲ್ಲದೆ ಹಗಲು–ರಾತ್ರಿ ಎನ್ನದೆ ಮಣ್ಣು ತೆಗೆಯುತ್ತಿದ್ದು, ಮಣ್ಣು ಅಕ್ರಮ ಸಾಗಣೆ ಅವ್ಯಾಹತವಾಗಿ ನಡೆಯುತ್ತಿದೆ. ಅವೈಜ್ಞಾನಿಕವಾಗಿ ಮಣ್ಣು ತೆಗೆಯುತ್ತಿರುವುದರಿಂದ ಒಂದೆಡೆ ಪ್ರಕೃತಿ ನಾಶವಾಗುತ್ತಿದ್ದರೆ, ಮತ್ತೊಂದೆಡೆ ಪ್ರಕೃತಿ ಸಂಪತ್ತಿನ ಮೂಲಕ ಸರ್ಕಾರಕ್ಕೆ ಬರುವ ಧನವು ಪೋಲಾಗುತ್ತಿದೆ.

ಇದೆಲ್ಲವು ತಿಳಿದಿರುವ ಗಣಿ ಮತ್ತು ಭೂ ವಿಜ್ಞಾನ ಇಲಾಖೆ ಮತ್ತು ಗ್ರಾ.ಪಂ ಅಧಿಕಾರಿಗಳು, ಜಾಣ ಕುಡುತನ ಪ್ರದರ್ಶಿಸುತ್ತಿದ್ದಾರೆ.

ಅಧಿಕಾರಿಗಳ ಕುಮ್ಮಕ್ಕು: ಕೆರೆ ಮತ್ತು ಸರ್ಕಾರಿ ಜಮೀನುಗಳಲ್ಲಿ ಮಣ್ಣ ತೆಗೆಯಬೇಕಾದರೆ ಗಣಿ ಮತ್ತು ಭೂ ವಿಜ್ಞಾನ ಇಲಾಖೆಯಿಂದ ಅನುಮತಿ ಪಡೆಯಬೇಕು. ಅನುಮತಿ ನೀಡಿದ ಬಳಿಕ ವೈಜ್ಞಾನಿಕವಾಗಿ ಮಣ್ಣು ತೆಗೆಯಲಾಗುತ್ತಿದೆಯೇ ಎಂಬುದನ್ನು ಅಧಿಕಾರಿಗಳು ಖಾತ್ರಿ ಪಡಿಸಿಕೊಳ್ಳಬೇಕು. ಆದರೆ ತಾಲ್ಲೂಕಿನಲ್ಲಿ ಈ ನಿಯಮಗಳನ್ನು ಉಲ್ಲಂಘಿಸಿ, ಅಕ್ರಮವಾಗಿ ಮಣ್ಣು ಸಾಗಟ ಮಾಡಲಾಗುತ್ತಿದೆ. ಇದಕ್ಕೆ ಅಧಿಕಾರಿಗಳೇ ಕುಮ್ಮಕ್ಕು ನೀಡುತ್ತಿದ್ದಾರೆ ಎಂಬುದು ಆರೋಪ ದಟ್ಟವಾಗಿ ಕೇಳಿ ಬರುತ್ತಿದೆ.

ಕೆರೆ ನಾಶ, ಅಂತರ್ಜಲಕ್ಕೆ ಕುತ್ತು: ಒಂದಾನೊಂದು ಕಾಲದಲ್ಲಿ ನೀರಿನ ಬಹುಮುಖ್ಯ ಆಕರವಾಗಿದ್ದ ಕರೆಗಳು ಇಂದು ಭೂ ಮಾಫಿಯಾಕ್ಕೆ ಬಲಿಯಾಗಿವೆ. ಅಂತರ್ಜಲ ವೃದ್ಧಿಗೆ ಹೆಚ್ಚು ಸಹಕಾರಿಯಾಗಿದ್ದ ಕೆರೆಗಳು ಒತ್ತುವರಿ ಮತ್ತು ಮಣ್ಣಿನ ಅವೈಜ್ಞಾನಿಕ ಸಾಗಾಟಕ್ಕೆ ನಲುಗಿವೆ. ಇದರಿಂದ ಅಂತರ್ಜಲ ಮಟ್ಟ ಸಂಪೂರ್ಣವಾಗಿ ಕುಸಿಯುತ್ತಿದೆ.

ಅನುಮತಿ ಪಡೆದ ಕೆರೆಗಳಲ್ಲಿಯೂ ಇಲಾಖೆ ನಿಗದಿಪಡಿಸಿರುವುದಕ್ಕಿಂತ ಹೆಚ್ಚಿನ ಆಳದಲ್ಲಿ ಮಣ್ಣು ತೆಗೆದು ಹಳ್ಳ ಮಾಡುತ್ತಿರುವುದರಿಂದ ಕೆರೆ ಅಂತರ್ಜಲ ಪದರಕ್ಕೆ ಪೆಟ್ಟು ಬೀಳುತ್ತಿದೆ. ಅಲ್ಲದೆ ಮಳೆ ಬಂದಾಗ ಅವುಗಳಲ್ಲಿ ನೀರು ತುಂಬಿಕೊಂಡು, ಆಳ ತಿಳಿಯದೆ ಮಕ್ಕಳು ಈಜಲು ಹೋಗಿ ಪ್ರಾಣ ಕಳೆದುಕೊಳ್ಳುತ್ತಿದ್ದಾರೆ.

ಈಜು ಬಾರದೆ ಹಳ್ಳಕ್ಕಿಳಿಯುವ ಮಕ್ಕಳು, ಮರಿ ಮತ್ತು ಹಿರಿಯರು ತಮ್ಮ ಪ್ರಾಣಗಳನ್ನು ಕಳೆದುಕೊಳ್ಳುತ್ತಿರುವ ಘಟನೆಗಳು ಸಹ ನಡೆಯುತ್ತಿವೆ.

ನಾಲ್ಕು ಕೆರೆಗಳಿಗೆ ಮಾತ್ರ ಅನುಮತಿ: ತಾಲ್ಲೂಕಿನ ಎಲ್ಲಾ ಕೆರೆಗಳಲ್ಲಿಯೂ ಮಣ್ಣಿನ ಅಕ್ರಮ ಸಾಗಾಟ ಅವ್ಯಾಹತವಾಗಿ ನಡೆಯುತ್ತಿದೆ. ಆದರೆ ಗಣಿ ಮತ್ತು ಭೂ ವಿಜ್ಞಾನ ಇಲಾಖೆಯು ತಾಲ್ಲೂಕಿನಲ್ಲಿ ಕೇವಲ ನಾಲ್ಕು ಹಳ್ಳಿಗಳಲ್ಲಿ ಮಾತ್ರ ಮಣ್ಣು ಸಾಗಾಟಕ್ಕೆ ಅನುಮತಿ ನೀಡಿದೆ ಎನ್ನುತ್ತಿದ್ದಾರೆ ಇಲಾಖೆ ಅಧಿಕಾರಿಗಳು.

ಹಾಡುಹಗಲೇ ಮಣ್ಣು ಸಾಗಟ ಎಗ್ಗಿಲ್ಲದೆ ತಾಲ್ಲೂಕಿನಲ್ಲಿ ನಡೆಯುತ್ತಿದೆ. ಈ ಕುರಿತು ಅಧಿಕಾರಿಗಳಿಗೆ ಸ್ಥಳೀಯರು ದೂರು ನೀಡಿದರೂ ದೂರು ಬಂದಾಗ ಮಾತ್ರ ಭೇಟಿ ನೀಡುವ ಅಧಿಕಾರಿಗಳು ಕಾಟಾಚಾರಕ್ಕೆ ಪರಿಶೀಲನೆ ನಡೆಸಿ ಒಂದೋ ಎರಡೂ ನೋಟೀಸ್ ನೀಡಿ ಜಾರಿ ಮಾಡುತ್ತಾರೆ. ಆದರೆ ಮಣ್ಣು ಅಕ್ರಮ ಸಾಗಾಟ ನಿಂತಿಲ್ಲ.

ಲ್ಯಾಟರೈಟ್, ಮರ‍್ರಂ ರಾಜಕೀಯ

ತಾಲ್ಲೂಕಿನಲ್ಲಿ ಖನಿಜಯುಕ್ತ ಲ್ಯಾಟರೈಟ್ ಮತ್ತು ಮರ‍್ರಂ ಮಣ್ಣಿ ಇದೆ. ಈ ಎರಡೂ ಮಣ್ಣಿನ ಬೆಲೆ ವ್ಯತ್ಯಾಸವಿದೆ. ಹೆಚ್ಚು ಬೆಲೆ ಬಾಳುವ ಲ್ಯಾಟರೈಟ್ ಮಣ್ಣನ್ನು ಕಡಿಮೆ ಬೆಲೆಯ ಮರ‍್ರಂ ಮಣ್ಣಿಗೆ ಸಮನಾಗಿ ಬೆಲೆ ನಿಗದಿಪಡಿಸಲಾಗುತ್ತಿದೆ. ಲ್ಯಾಟರೈಟ್ ಮಣ್ಣನ್ನು ಸೀಮೆಂಟ್ ಮತ್ತಿತರೆ ವಸ್ತುಗಳ ತಯಾರಿಕೆಗೆ ಬಳಸಲಾಗುತ್ತಿದೆ. ಮಣ್ಣು ಸಾಗಾಟ ಮಾಡುವವರೊಂದಿಗೆ ಅಧಿಕಾರಿಗಳ ಶಾಮೀಲಾಗಿ ಸರ್ಕಾರಕ್ಕೆ ಮೋಸ ಮಾಡುತ್ತಿದ್ದಾರೆ ಎಂದು ದಲಿತ ವಿದ್ಯಾರ್ಥಿ ಒಕ್ಕೂಟದ ಮುಖಂಡ ರವೀಂದ್ರ ಅವರು ಆರೋಪಿಸಿದ್ದಾರೆ.