ರೋಚಕ ಆಫ್ ದ ರೋಡ್ ರ‌್ಯಾಲಿ

ಗೋಕಾಕ: ಗೋಕಾಕ ಚಾಲೆಂಜ್ 2012 ರಾಷ್ಟ್ರ ಮಟ್ಟದ ಆಫ್ ರೋಡ್ ರ‌್ಯಾಲಿ ಸ್ಪರ್ಧೆಗೆ ಶನಿವಾರ  ನಗರದ ಮಹರ್ಷಿ ವಾಲ್ಮೀಕಿ ಕ್ರೀಡಾಂಗಣದಲ್ಲಿ ಯಮಕನಮರಡಿ ಶಾಸಕ ಸತೀಶ ಜಾರಕಿಹೊಳಿ ವಿಧ್ಯುಕ್ತವಾಗಿ ಚಾಲನೆ ನೀಡಿದರು.

ಎರಡು ದಿನಗಳ ಕಾಲ ನಡೆಯುವ ರಾಷ್ಟ್ರ ಮಟ್ಟದ `ಆಫ್ ದಿ ರೋಡ್ ರ‌್ಯಾಲಿ~ಯಲ್ಲಿ ಕರ್ನಾಟಕ ಸೇರಿದಂತೆ ಹೈದರಾಬಾದ, ಗೋವಾ, ಸತಾರಾ, ಪುಣೆ, ಕರಾಡ್ ಮೊದಲಾದ ನಗರಗಳಿಂದ 75 ವಾಹನಗಳು ಭಾಗವಹಿಸಿವೆ.

ಸ್ಪರ್ಧೆಯಲ್ಲಿ ಭಾಗವಹಿಸಿದ್ದ  150 ಜನ ಸ್ಪರ್ಧಾಳುಗಳು ತಮ್ಮ  ರೇಸ್ ವಾಹನಗಳಲ್ಲಿ ಜೀವದ ಹಂಗು ತೊರೆದು ಸಹಾಸಮಯ ಹಾಗೂ ರೋಮಾಂಚನಕಾರಿ ಪ್ರದರ್ಶನ ನಡೆಸಿದರು. ಈ ರ‌್ಯಾಲಿ, ಸಹಸ್ರಾರು ಕ್ರೀಡಾಭಿಮಾನಿಗಳ ಮೈನವಿರೇಳಿಸಿತು.

ತಾಲ್ಲೂಕಿನ ಧೂಪದಾಳ-ಕೊಣ್ಣೂರ ಗ್ರಾಮಗಳ ಮಧ್ಯದ ಕಲ್ಲಿನ ಕಣಿವೆಯಲ್ಲಿ ಆಫ್ ದಿ ರೋಡ್ ರ‌್ಯಾಲಿಯ ಸ್ಪರ್ಧೆಯಲ್ಲಿ ಭಾಗವಹಿಸಿದ 75 ವಾಹನಗಳು ಸಂಜೆಯವರೆಗೆ ನಡೆಸಿದ ಸಾಹಸಮಯ ಪ್ರದರ್ಶನ ಮತ್ತು ತಾಂತ್ರಿಕವಾಗಿ ವಾಹನಗಳನ್ನು ಬಂಡೆ ಕಲ್ಲುಗಳ ಮೇಲೆ ಚಲಾಯಿಸಿ ಜನರನ್ನು ಬೆಚ್ಚಿ ಬೀಳುವಂತೆ ಮಾಡಿದರು.

ಆಫ್ ದಿ ರೋಡ್ ರ‌್ಯಾಲಿ ಜನಪ್ರಿಯತೆ ಪಡೆದಿದೆ. ಈ ಸ್ಪರ್ಧೆಯಿಂದ ಯುವ ಕ್ರೀಡಾಪಟುಗಳಿಗೆ ಪ್ರೇರಣೆ ದೊರೆಯಲಿದೆ. ಹೀಗಾಗಿ ಹೆಚ್ಚಿನ ಸಂಖ್ಯೆಯಲ್ಲಿ ಸ್ಪರ್ಧಾಳುಗಳು ಪಾಲ್ಗೊಳ್ಳಲು ಸಾಧ್ಯವಾಗಿದೆ ಎಂದು ಸಂಘಟಕ ಅಯೂಬ್ ಖಾನ್ ಮಾಧ್ಯಮದವರಿಗೆ ತಿಳಿಸಿದರು.

ಸಮೀಪದ ಯೋಗಿಕೊಳ್ಳ ಗುಡ್ಡಗಾಡುಗಳ ಮಧ್ಯ ಹರೆಯುವ ಮಾರ್ಕಂಡೇಯ ನದಿ ಮತ್ತು ಗುಡ್ಡಗಾಡು ಪ್ರದೇಶದಲ್ಲಿ ಭಾನುವಾರ ಸಹ ಆಫ್ ದಿ ರೋಡ್ ರ‌್ಯಾಲಿ ನಡೆಯಲಿದೆ ಎಂದು ಸಂಘಟಕರು ಹೇಳಿದರು.