ಬೆಳಗಾವಿ: ನಗರದಲ್ಲಿ ಶುಕ್ರವಾರ ಮಧ್ಯಾಹ್ನ 1.30ರ ಸುಮಾರಿಗೆ ಕೆಲಕಾಲ ಆಗಸದಿಂದ ಕೇಳಿಬಂದ ಜೋರು ಶಬ್ದ ಜನರ ಎದೆನಡುಗಿಸಿತು.
ನಿವಾಸಿಗಳು ಆತಂಕ ಹಾಗೂ ಗೊಂದಲದಿಂದ ಮನೆಗಳಿಂದ ಹೊರ ಬಂದು ಆಕಾಶದತ್ತ ದೃಷ್ಟಿ ಹಾಯಿಸಿದ ದೃಶ್ಯ ಸಾಮಾನ್ಯವಾಗಿತ್ತು. ವಿಶೇಷವಾಗಿ ಮಕ್ಕಳು ವಿಮಾನಗಳನ್ನು ಕಣ್ತುಂಬಿಕೊಳ್ಳಲು ಗಗನದತ್ತ ನೋಡುತ್ತಿದ್ದರು.
ಇಲ್ಲಿನ ಸಾಂಬ್ರಾದಲ್ಲಿ ವಿಮಾನನಿಲ್ದಾಣ ಹಾಗೂ ವೈಮಾನಿಕ ತರಬೇತಿ ಶಾಲೆಯೂ ಇರುವುದರಿಂದ ವಿಮಾನಗಳು ಹಾರಾಡುವ ಶಬ್ದ ಆಗಾಗ ಸಾಮಾನ್ಯವಾಗಿ ಕೇಳಿಬರುತ್ತಿರುತ್ತದೆ. ಆದರೆ, ಶುಕ್ರವಾರ ಆಕಾಶವನ್ನು ಸೀಳಿಕೊಂಡು ಹೋಗುತ್ತಿದ್ದ ವಿಮಾನಗಳು ಬಹಳ ಶಬ್ದವನ್ನು ಉಂಟು ಮಾಡಿದವು. ಜೊತೆಗೆ ಕುತೂಹಲವನ್ನೂ ಮೂಡಿಸಿದವು. ಅವು ತೀರಾ ಕೆಳಮಟ್ಟದಲ್ಲಿ ಹಾರಾಡಿದ ಸುದ್ದಿಯು ಕೆಲಕಾಲ ಆತಂಕವನ್ನೂ ಹರಡಿತು. ಈ ಕುರಿತು ಸಾಮಾಜಿಕ ಜಾಲತಾಣದಲ್ಲೂ ಬಹಳ ಚರ್ಚೆಯಾಯಿತು.
‘ಅವು ಭಾರತೀಯ ವಾಯುಸೇನೆಗೆ ಸೇರಿದ ಮಿಗ್–29ಕೆ ಫೈಟರ್ ವಿಮಾನಗಳು. ತರಬೇತಿಯಲ್ಲಿ ಅವನ್ನು ಬಳಸಲಾಯಿತು. ಮೂರು ವಿಮಾನಗಳು ಇಲ್ಲಿನ ಆಗಸದಲ್ಲಿ ಹಾರಾಡಿದವು. ಬಹಳ ಕೆಳಮಟ್ಟದಲ್ಲಿ ಅವುಗಳು ಹಾರಾಡಿದ್ದರಿಂದಾಗಿ ಬಹಳ ಶಬ್ದ ಕೇಳಿಸಿತು. ಸಾಂಬ್ರಾ ವಿಮಾನನಿಲ್ದಾಣದಲ್ಲಿ ಅವು ಇಳಿದಿದ್ದವು’ ಎಂದು ವಿಮಾನನಿಲ್ದಾಣದ ಮೂಲಗಳು ಖಚಿತಪಡಿಸಿವೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್ಬುಕ್ ಪುಟ ಫಾಲೋ ಮಾಡಿ.