ಕಾಗವಾಡ: ಪ್ರವಾಹಕ್ಕೆ ನಲುಗಿದ ಸಂತ್ರಸ್ತರು

ಕಾಗವಾಡ: ಕಳೆದ ಕೆಲವು ದಿನಗಳಿಂದ ತಾಲ್ಲೂಕಿನ ಕೃಷ್ಣಾ ನದಿಯ ನೀರಿನ ಪ್ರಮಾಣ ಏರಿಕೆ ಆಗದೆ ಇತ್ತ ಇಳಿಕೆಯೂ ಆಗದೆ ಸ್ಥಿರವಾಗಿದ್ದು, ತೀರದ ಗ್ರಾಮಗಳಲ್ಲಿ ಪ್ರವಾಹದ ನೀರು ವಸತಿ ಪ್ರದೇಶಕ್ಕೆ ನುಗ್ಗಿದ ಪರಿಣಾಮ ನಲುಗಿದ್ದು, ಸಂತ್ರಸ್ತರು ತಾಲ್ಲೂಕು ಆಡಳಿತ ತೆರೆದಿರುವ ಕಾಳಜಿ ಕೇಂದ್ರಗಳಲ್ಲಿ ಜಾನವಾರು ಸಮೇತ ಆಶ್ರಯ ಪಡೆದಿದ್ದಾರೆ.

ತಾಲ್ಲೂಕಿನ ಕೃಷ್ಣಾ ‌ನದಿಯ ನೀರಿನ ಮಟ್ಟ ಹೆಚ್ಚಾದರೆ ಅತಿ ಹೆಚ್ಚು ರಸ್ತೆಗಳು ಜಲಾವೃತ ಆಗುತ್ತವೆ. ಸದ್ಯ ತಾಲ್ಲೂಕಿನ 9 ರಸ್ತೆಗಳು ಜಲಾವೃತ ಆಗಿವೆ.‌ ₹5 ಕೋಟಿ ವೆಚ್ಚದಲ್ಲಿ ಎತ್ತರ ಹೆಚ್ಚಿಸಿ ನಿರ್ಮಿಸಿದ ಉಗಾರ ಖುರ್ದ ದಿಂದ ಉಗಾರ ಬುದ್ರುಕ್ ವರೆಗಿನ ಸೇತುವೆಯೂ ಜಲಾವೃತವಾಗಿರುವುದು ವಿಪರ್ಯಾಸ.

ತಾಲ್ಲೂಕು ಆಡಳಿತದಿಂದ ಜೂಗುಳ, ಬಣಜವಾಡ, ಕಾತ್ರಾಳ, ಕೃಷ್ಣಾ ಕಿತ್ತೂರು, ಗ್ರಾಮಗಳಲ್ಲಿ ಒಟ್ಟು ನಾಲ್ಕು ಕಾಳಜಿ ಕೇಂದ್ರಗಳನ್ನು ತೆರಯಲಾಗಿದೆ. ಅವುಗಳಲ್ಲಿ 664 ಜನ ಪ್ರವಾಹ ಸಂತ್ರಸ್ತರು ಆಶ್ರಯ ಪಡೆದಿದ್ದಾರೆ. ತಾಲ್ಲೂಕಿನ ವಿವಿಧ ಗ್ರಾಮಗಳ ಒಟ್ಟು 2,524 ಜಾನವಾರುಗಳಿಗೆ ಅಗತ್ಯ ಮೇವು, ವಿತರಣೆ ಮಾಡಲಾಗುತ್ತಿದೆ. ತಾಲ್ಲೂಕಿನ ಸರಿ ಸುಮಾರು 6,700 ಹೆಕ್ಟೇರ್ ಪ್ರದೇಶದ ಜಮೀನಿನ ಬೆಳೆಗಳಿಗೆ ನದಿಯ ನೀರು ಆವರಿಸಿದೆ. ಪ್ರವಾಹ ಇಳಿದ ಕೂಡಲೇ ಸರ್ವೆ ಕಾರ್ಯ ಮಾಡಲಾಗುವುದು ಎಂದು ತಹಶೀಲ್ದಾರ್ ರಾಜೇಶ ಬುರ್ಲಿ ತಿಳಿಸಿದ್ದಾರೆ.