ಕೌಜಲಗಿ: ಇದ್ದೂ ಇಲ್ಲದಂತಾದ ಪಶು ಆಸ್ಪತ್ರೆ

ಕೌಜಲಗಿ: ವೈದ್ಯರ, ಕೊರತೆ, ಸಿಬ್ಬಂದಿ ಕೊರತೆ, ಶುಚಿತ್ವದ ಕೊರತೆ ಹಾಗೂ ಔಷಧೋಪಚಾರಕ್ಕೆ ಪರದಾಟ... 

ಇಲ್ಲಿನ ಹೋಬಳಿ ಕೇಂದ್ರದ ಪಶು ಸ್ಪತ್ರೆಯ ಸದ್ಯದ ಪರಿಸ್ಥಿತಿ ಇದು. ಕಾರ್ಯವಾಪ್ತಿ ಹಾಗೂ ಕೆಲಸದ ಒತ್ತಡ ಹೆಚ್ಚಾಗಿದ್ದರಿಂದ ಈ ಆಸ್ಪತ್ರೆ ಇಲ್ಲಿ ಇದ್ದೂ ಇಲ್ಲದಂತಾಗಿದೆ. ರೈತರು, ತೋಟಪಟ್ಟಿಗಳ ಜನರು ದಿನವೂ ಜಾನುವಾರುಗಳನ್ನು ಚಿಕಿತ್ಸೆಗೆ ಕರೆತರುತ್ತಾರೆ. ಆದರೆ, ವೈದ್ಯರು– ಸಿಬ್ಬಂದಿ ಸೂಕ್ತ ಸಮಯಕ್ಕೆ ಸಿಗದೇ ಮರಳಿ ಹೋಗುವುದು ಸಾಮಾನ್ಯವಾಗಿದೆ. ಪಶು ಆಸ್ಪತ್ರೆ ಸರಿಯಾಗಿ ತೆರೆಯದೇ ಇರುವುದರಿಂದ ಸುತ್ತಲಿನ ಪರಿಸರ ಕಸದ ತೊಟ್ಟಿಯಂತಾಗಿದೆ.

ಕೌಜಲಗಿ ಸುತ್ತಮುತ್ತಲಿನ 10 ಗ್ರಾಮಗಳಿಗೆ ಇಲ್ಲಿಯ ಪಶು ಆಸ್ಪತ್ರೆ ಒಂದೇ ಕೇಂದ್ರವಾಗಿದೆ. ನಿತ್ಯ ರೈತರು ಆಡು, ಕುರಿ, ಮೇಕೆ, ಎಮ್ಮೆ, ಹಸು ಮುಂತಾದ ಪ್ರಾಣಿಗಳ ಆರೋಗ್ಯ ಚಿಕಿತ್ಸೆಗಾಗಿ ಬರುತ್ತಾರೆ. ಆದರೆ, ಈಗಿರುವ ಪರಿಸ್ಥಿತಿಯನ್ನು ಗಮನಿಸಿದರೆ ಇದ್ದ ಆಸ್ಪತ್ರೆಯೂ ಮುಚ್ಚಿ ಹೋಗುವ ಸ್ಥಿತಿ ಇದೆ.

ಈ ಬಗ್ಗೆ ‘ಪ್ರಜಾವಾಣಿ’ಗೆ ಪ್ರತಿಕ್ರಿಯೆ ನೀಡಿದ ಆಸ್ಪತ್ರೆಯ ವೈದ್ಯಾಧಿಕಾರಿ ಡಾ.ಸಂಜೀವ ಚನ್ನಾಳ, ‘ಕೌಜಲಗಿ ಪಶು ಆಸ್ಪತ್ರೆಗೆ ಸುತ್ತಲಿನ 10 ಹಳ್ಳಿಗಳು ಒಳಗೊಂಡಿದೆ. ಇದರಿಂದ ಕಾರ್ಯ ಒತ್ತಡ ಹೆಚ್ಚಾಗಿದೆ. ಹೋಬಳಿ ಮಟ್ಟದ ಪಶು ಆಸ್ಪತ್ರೆಯಲ್ಲಿ ಸಿಬ್ಬಂದಿಯ ಕೊರತೆ ಇದ್ದು, ವೈದ್ಯಾಧಿಕಾರಿಯಾಗಿ ನಾನು ಒಬ್ಬನೇ ಕಾರ್ಯನಿರ್ವಹಿಸುತ್ತಿದ್ದೇನೆ. ರೈತರ ತೋಟಗಳಿಗೂ ಭೇಟಿ ನೀಡಿ ಪಶುಗಳಿಗೆ ಚಿಕಿತ್ಸೆ ನೀಡುತ್ತಿದ್ದೇನೆ. ಹೆಚ್ಚಿನ ಸಿಬ್ಬಂದಿಯ ಅಗತ್ಯ ಇದೆ’ ಎಂದರು.

ಈ ಬಗ್ಗೆ ಪಶು ಪಾಲನೆ ಮತ್ತು ಪಶು ವೈದ್ಯಕೀಯ ಸೇವಾ ಇಲಾಖೆ ಜಿಲ್ಲಾ ಆಥವಾ ತಾಲ್ಲೂಕು ಮಟ್ಟದ ಅಧಿಕಾರಿಗಳು ಗಮನ ಹರಿಸಿಲ್ಲ. ಈ ಬಗ್ಗೆ ಜನ ಸಾಕಷ್ಟು ಮನವಿ ಮಾಡಿದರೂ ಅಧಿಕಾರಿಗಳು ನಿರ್ಲಕ್ಷ್ಯ ಮಾಡಿದ್ದಾರೆ ಎಂದೂ ಜನ ದೂರಿದ್ದಾರೆ.