ಮೈಕ್ರೊಸಾಫ್ಟ್‌: ‘ಟ್ರೇಡ್‌ ಇನ್‌ ಸ್ಕೀಮ್‌’ ಯೋಜನೆ

ಬೆಂಗಳೂರು: ಸಣ್ಣ ಹಾಗೂ ಮಧ್ಯಮ ಕೈಗಾರಿಕೆಗಳಿಗೆ ನೆರವಾಗಲು ಮೈಕ್ರೊಸಾಫ್ಟ್ ಇಂಡಿಯಾ ಸಂಸ್ಥೆಯು ಶುಕ್ರವಾರ ‘ವಿಂಡೋಸ್‌ ಅಜೂರ್‌ ಟ್ರೇಡ್‌ ಇನ್‌ ಯೋಜನೆ’ ಪ್ರಕಟಿಸಿದೆ. ಈ ಯೋಜನೆ ಜೂನ್‌ 30ರ ವರೆಗೆ ಜಾರಿಯಲ್ಲಿ ಇರಲಿದೆ.

ನಗರದಲ್ಲಿ ಶುಕ್ರವಾರ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಸಂಸ್ಥೆಯ ವ್ಯವಸ್ಥಾಪಕ ನಿರ್ದೇಶಕ ಕರಣ್‌ ಬಾಜ್ವಾ, ‘ಈ ಯೋಜನೆಯ ಮೂಲಕ ಗ್ರಾಹಕರು ತಮ್ಮ ಸಾಂಪ್ರದಾಯಿಕ ಹಾರ್ಡ್‌ವೇರ್‌ ಅನ್ನು ಸಂಸ್ಥೆಗೆ ನೀಡಬಹುದು. ಈ ಹಾರ್ಡ್‌ವೇರ್‌ಗೆ ನಿರ್ದಿಷ್ಟ ಮೌಲ್ಯ ನೀಡಲಾಗುತ್ತದೆ. ಅದೇ ಸಮಯದಲ್ಲಿ ವಿಂಡೋಸ್‌ ಅಜೂರ್‌ ಬಳಸುವ ಮೂಲಕ ಅವರು ಕ್ಲೌಡ್‌ ಕಂಪ್ಯೂಟರ್‌ಗೆ ವರ್ಗಾವಣೆ ಆಗಬಹುದು. ಈ ವರ್ಗಾವಣೆಯಿಂದ ಸಣ್ಣ ಹಾಗೂ ಮಧ್ಯಮ ಉದ್ಯಮಗಳ ನಿರ್ವಹಣಾ ವೆಚ್ಚ ಕಡಿಮೆ ಆಗಲಿದೆ’ ಎಂದರು.

‘ದೇಶದಲ್ಲಿರುವ ಉದ್ಯಮಗಳ ಪೈಕಿ ಸಣ್ಣ ಹಾಗೂ ಮಧ್ಯಮ ಉದ್ಯಮ ಸಂಸ್ಥೆಗಳ ಸಂಖ್ಯೆ ಶೇ 40ರಷ್ಟು. ಆದರೆ, ಈ ಸಂಸ್ಥೆಗಳು ಮಾಹಿತಿ ತಂತ್ರಜ್ಞಾನದ ಹೆಚ್ಚಿನ ಲಾಭವನ್ನು ಪಡೆದುಕೊಳ್ಳುತ್ತಿಲ್ಲ. ಈ ಸಂಸ್ಥೆಗಳು ಮಾಹಿತಿ ತಂತ್ರಜ್ಞಾನದ ಮೇಲೆ ಮಾಡುವ ಹೂಡಿಕೆಯೂ ಕಡಿಮೆ. ಈ ಹಿನ್ನೆಲೆಯಲ್ಲಿ ಸಂಸ್ಥೆ ಈ ಯೋಜನೆಯನ್ನು ಪ್ರಕಟಿಸಿದೆ’ ಎಂದರು.

‘ಸಂಸ್ಥೆಗಳು ಟೋಲ್‌ ಫ್ರೀ ಸಂಖ್ಯೆ 180030704660 ಮೂಲಕ ನೋಂದಾಯಿಸಿ­ಕೊಳ್ಳಬೇಕು. ಬಳಿಕ ಮೈಕ್ರೊಸಾಫ್ಟ್‌ವೇರ್‌ನ ಅಧಿಕೃತ ಹಾರ್ಡ್‌ವೇರ್‌ ಪುನರ್‌ಬಳಕೆಯ ಪಾಲುದಾರರು ಕರೆ ಮಾಡಿದವರನ್ನು ಸಂಪರ್ಕಿಸುತ್ತಾರೆ ಹಾಗೂ ಹಾರ್ಡ್‌ ವೇರ್‌ನ ಮೌಲ್ಯವನ್ನು ವಿಶ್ಲೇಷಿಸುತ್ತಾರೆ. ಜೊತೆಗೆ ಸಂಸ್ಥೆಯಿಂದ ಹಳೆಯ ಹಾರ್ಡ್‌ವೇರ್‌ ಕೊಂಡೊಯ್ಯಲು ವ್ಯವಸ್ಥೆ ಮಾಡುತ್ತಾರೆ. ಗ್ರಾಹಕರು ವಿಂಡೋಸ್‌ ಅಜೂರ್‌ ಮೇಲೆ ಮಾಸಿಕ ಸಾಲ ಪಡೆದುಕೊಳ್ಳಲು ಈ ಮೌಲ್ಯವನ್ನು ಬಳಸಿಕೊಳ್ಳಬಹುದು’ ಎಂದರು.