ರಸ್ತೆ ಇತಿಹಾಸ ನಿರ್ವಹಣೆಗೆ ಸೂಚನೆ

ಬೆಂಗಳೂರು: `ಬಿಬಿಎಂಪಿ ವ್ಯಾಪ್ತಿಯ ಎಲ್ಲ 198 ವಾರ್ಡ್ ರಸ್ತೆಗಳ ಇತಿಹಾಸದ ರಿಜಿಸ್ಟ್ರರ್ ನಿರ್ವಹಣೆ ಮಾಡಬೇಕು' ಎಂದು ಬಿಬಿಎಂಪಿ ಮುಖ್ಯ ಎಂಜಿನಿಯರ್ ಎಂ. ರಂಗರಾಜು ಆದೇಶ ಹೊರಡಿಸಿದ್ದಾರೆ.

`ಇನ್ನುಮುಂದೆ ಯಾವುದೇ ರಸ್ತೆಯಲ್ಲಿ ಕಾಮಗಾರಿ ಕೈಗೊಳ್ಳಬೇಕಿದ್ದರೆ, ತಾಂತ್ರಿಕ ಮಂಜೂರಾತಿ ನೀಡಬೇಕಿದ್ದರೆ, ಬಿಲ್ ಬಿಡುಗಡೆ ಮಾಡಬೇಕಿದ್ದರೆ ಆ ರಸ್ತೆಯ ಇತಿಹಾಸದ ರಿಜಿಸ್ಟ್ರರ್ ಪರಿಶೀಲಿಸಿ ನಿರ್ಧಾರ ಕೈಗೊಳ್ಳಬೇಕು.

ಸಂಬಂಧಪಟ್ಟ ಕಾಮಗಾರಿ ಬೇರೆ ಯಾವುದೇ ವಿಭಾಗದಿಂದ ಪುನರಾವರ್ತನೆ ಆಗದಂತೆ ಎಚ್ಚರ ವಹಿಸಬೇಕು' ಎಂದು ತಿಳಿಸಿದ್ದಾರೆ. ಬಿಬಿಎಂಪಿ ಸದಸ್ಯ ಎನ್.ಆರ್. ರಮೇಶ್ ಈ ಸಂಬಂಧ ಆಯುಕ್ತರು ಹಾಗೂ ಮುಖ್ಯ ಎಂಜಿನಿಯರ್ ಅವರಿಗೆ ಪತ್ರ ಬರೆದಿದ್ದರು.