ಸಿಇಟಿ ಕ್ಯಾಶುವಲ್ ಸುತ್ತು: ಆದ್ಯತೆಗೆ ಗುರುತಿಸಲು ಅವಕಾಶ

ಬೆಂಗಳೂರು: ವೃತ್ತಿ ಶಿಕ್ಷಣ ಕೋರ್ಸ್‌ಗಳ ಪ್ರವೇಶಕ್ಕೆ ಕ್ಯಾಶುವಲ್ ಸುತ್ತಿನ ಆನ್‌ಲೈನ್ ಕೌನ್ಸೆಲಿಂಗ್‌ಗೆ ಆದ್ಯತೆಗಳನ್ನು ಗುರುತಿಸಲು ಸೋಮವಾರ ಮಧ್ಯಾಹ್ನ 12 ಗಂಟೆವರೆಗೆ ಅವಕಾಶ ಇದೆ.

ಕ್ಯಾಶುವಲ್ ಸುತ್ತಿನಲ್ಲಿ ವಿದ್ಯಾರ್ಥಿಗಳು ಗುರುತಿಸಿದ ಆದ್ಯತೆಯ ಫಲಿತಾಂಶವನ್ನು ಇದೇ 8ರಂದು ಸಂಜೆ 7 ಗಂಟೆಯ ನಂತರ ಪ್ರಕಟಿಸಲಾಗುವುದು ಎಂದು ಕರ್ನಾಟಕ ಪರೀಕ್ಷಾ ಪ್ರಾಧಿಕಾರದ ಪ್ರಕಟಣೆ ತಿಳಿಸಿದೆ.
ವೈದ್ಯಕೀಯ ಕೋರ್ಸ್ ಸೇರುವ 1,332, ದಂತವೈದ್ಯಕೀಯ ಕೋರ್ಸ್‌ನ 131, ಎಂಜಿನಿಯರಿಂಗ್‌ನ 19,277, ವಾಸ್ತುಶಿಲ್ಪ ಕೋರ್ಸ್‌ನ 131 ವಿದ್ಯಾರ್ಥಿಗಳು ಸೇರಿದಂತೆ ಒಟ್ಟು 21,017 ವಿದ್ಯಾರ್ಥಿಗಳು ಮೊದಲ ಸುತ್ತಿನಲ್ಲಿ ಸೀಟು ಹಂಚಿಕೆ ದಾಖಲಾತಿ ಪತ್ರಗಳನ್ನು ಪಡೆದುಕೊಂಡಿದ್ದಾರೆ.

ಬೆಂಗಳೂರಿನ ಪಿಎನ್‌ಎಸ್ ಮಹಿಳಾ ಕಾಲೇಜಿನ 30 ಮೆಕಾನಿಕಲ್ ಎಂಜಿನಿಯರಿಂಗ್ ಸೀಟುಗಳು ಹೆಚ್ಚುವರಿಯಾಗಿ ದೊರೆಯಲಿವೆ. ಈ ಕುರಿತು ಪ್ರಾಧಿಕಾರದ ವೆಬ್‌ಸೈಟ್‌ನಲ್ಲಿ ಮಾಹಿತಿ ನೀಡಲಾಗಿದೆ.