ಆಟಿಕೆ ಪೊಟ್ಟಣದಲ್ಲಿ ಗಾಂಜಾ

ಬೆಂಗಳೂರು: ಅಮೆರಿಕದಿಂದ ನಗರಕ್ಕೆ ಕೋರಿಯರ್ ಮೂಲಕ ಬಂದಿದ್ದ ಆಟಿಕೆ ವಸ್ತುಗಳ ಪೊಟ್ಟಣದಲ್ಲಿ ಗಾಂಜಾ ಪತ್ತೆಯಾಗಿದ್ದು, ಅದನ್ನು ಕಸ್ಟಮ್ಸ್ ಅಧಿಕಾರಿಗಳು ಜಪ್ತಿ ಮಾಡಿದ್ದಾರೆ.

‘ಕೆಂಪೇಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಕಾರ್ಗೊ ಮೂಲಕ ಪೊಟ್ಟಣ ಬಂದಿತ್ತು. ಅನುಮಾನಗೊಂಡು ಅದನ್ನು ತೆರೆದು ನೋಡಿದಾಗ ಆಟಿಕೆ ವಸ್ತುಗಳು ಕಂಡಿದ್ದವು. ಅವುಗಳನ್ನು ಬಿಚ್ಚಿ ನೋಡಿದಾಗ ಅದರೊಳಗೆ ಗಾಂಜಾ ಇತ್ತು’ ಎಂದು ಕಸ್ಟಮ್ಸ್ ಮೂಲಗಳು ತಿಳಿಸಿವೆ.

‘₹ 72 ಲಕ್ಷ ಮೌಲ್ಯದ 448 ಗ್ರಾಂ. ಗಾಂಜಾ ಜಪ್ತಿ ಮಾಡಲಾಗಿದೆ. ಎನ್‌ಡಿಪಿಎಸ್ ಕಾಯ್ದೆಯಡಿ ಪ್ರಕರಣ ದಾಖಲಿಸಲಾಗಿದೆ. ಪೊಟ್ಟಣದ ಮೇಲಿನ ವಿಳಾಸ ಆಧರಿಸಿ ತನಿಖೆ ಮುಂದುವರಿಸಲಾಗಿದೆ’ ಎಂದೂ ಮೂಲಗಳು ಹೇಳಿವೆ.