ನ್ಯೂ ಫೋರಂ ಮಾಲ್‌ನಲ್ಲಿ ಲುಲು ಡೈಲಿ ಮಳಿಗೆ

ಪ್ರಜಾವಾಣಿ ವಾರ್ತೆ

ಬೆಂಗಳೂರು: ಲುಲು ಸಮೂಹವು ಕನಕಪುರ ರಸ್ತೆಯ ಪ್ರೆಸ್ಟೀಜ್ ಫಾಲ್ಕನ್ ಸಿಟಿಯ ನ್ಯೂ ಫೋರಂ ಮಾಲ್‌ನಲ್ಲಿ ‘ಲುಲು ಡೈಲಿ’ ಮಳಿಗೆಯನ್ನು ತೆರೆದಿದೆ. ಬೆಂಗಳೂರಿನಲ್ಲಿ ಸಮೂಹದ ಎರಡನೇ ಮಳಿಗೆ ಇದಾಗಿದೆ. ಪ್ರೆಸ್ಟೀಜ್ ಸಮೂಹದ ಎಂ.ಡಿ. ರಿಜ್ವಾನ್ ರಜಾಕ್ ಅವರು ಈ ಮಳಿಗೆಯನ್ನು ಉದ್ಘಾಟಿಸಿದರು.

ಹಣ್ಣು, ತರಕಾರಿಗಳು, ಡೈರಿ ಉತ್ಪನ್ನಗಳು, ಮಾಂಸ, ಮೀನು, ಸಿದ್ಧ ಆಹಾರ, ಶಾಕಾಹಾರ ಮತ್ತು ಮಾಂಸಾಹಾರಕ್ಕೆ ಪ್ರತ್ಯೇಕ ಕೌಂಟರ್‌ಗಳೊಂದಿಗೆ ಲೈವ್ ಕಿಚನ್ ಅನ್ನು ಈ ಮಳಿಗೆ ಒಳಗೊಂಡಿದೆ ಎಂದು ಪ್ರಕಟಣೆ ತಿಳಿಸಿದೆ.

ಲುಲು ಸಮೂಹದ ಕಾರ್ಯನಿರ್ವಾಹಕ ನಿರ್ದೇಶಕ ಡಾ.ಎ.ವಿ. ಅನಂತರಾಂ, ಲುಲು ಸಮೂಹದ ಭಾರತ ಮತ್ತು ಒಮಾನ್ ನಿರ್ದೇಶಕ ಎಂ.ಎ. ನಿಷಾದ್, ಲುಲು ಗ್ರೂಪ್ ಇಂಡಿಯಾದ ಸಿಇಒ ರೆಜಿತ್ ರಾಧಾಕೃಷ್ಣನ್ ಮತ್ತು ಇತರ ಹಿರಿಯ ಅಧಿಕಾರಿಗಳು ಉಪಸ್ಥಿತರಿದ್ದರು.