ಮತಪಟ್ಟಿಗೆ ಸೇರಿಸಲು 14,391 ಅರ್ಜಿ ಸ್ವೀಕಾರ

ಬೀದರ್‌: ಲೋಕಸಭೆ ಚುನಾವಣೆ ಹಿನ್ನೆಲೆ­ಯಲ್ಲಿ ಚುನಾವಣಾ ಆಯೋಗ ಭಾನುವಾರದಿಂದ ಆರಂಭಿಸಿರುವ ಮತದಾರರ ಪಟ್ಟಿ ಪರಿಷ್ಕರಣೆ ಹಾಗೂ ಅರ್ಹ ಮತದಾರರ ಹೆಸರು ನೋಂದಣಿ ಅಭಿಯಾನದಲ್ಲಿ ಜಿಲ್ಲೆಯಲ್ಲಿ ಒಟ್ಟು 14,391 ಅರ್ಜಿಗಳು  ಸ್ವೀಕೃತವಾಗಿವೆ.

ಮತದಾರರ ಪಟ್ಟಿ ಪರಿಷ್ಕರಣೆಯ ಜಿಲ್ಲೆಯಲ್ಲಿ ಉತ್ತಮ ಸ್ಪಂದನೆ ದೊರೆತಿದೆ ಎಂದು ಜಿಲ್ಲಾಧಿಕಾರಿ ಡಾ. ಪಿ.ಸಿ. ಜಾಫರ್‌ ತಿಳಿಸಿದ್ದಾರೆ.

ಬಸವಕಲ್ಯಾಣ ವಿಧಾನಸಭಾ ಕ್ಷೇತ್ರ­ದಲ್ಲಿ 2,304, ಹುಮನಾಬಾದ್‌ ವಿಧಾನ­ಸಭಾ ಕ್ಷೇತ್ರದಲ್ಲಿ 3,699, ಬೀದರ್‌ ದಕ್ಷಿಣ ಕ್ಷೇತ್ರದಲ್ಲಿ 2,450, ಬೀದರ್‌ ವಿಧಾನಸಭಾ ಕ್ಷೇತ್ರದಲ್ಲಿ 2,707, ಭಾಲ್ಕಿ ಕ್ಷೇತ್ರದಲ್ಲಿ 1,352 ಹಾಗೂ ಔರಾದ್‌ ವಿಧಾನಸಭಾ ಕ್ಷೇತ್ರದಲ್ಲಿ 1,879 ಅರ್ಜಿಗಳು ಸಲ್ಲಿಕೆಯಾಗಿವೆ ಎಂದು ಹೇಳಿದ್ದಾರೆ.

ಚುನಾವಣಾ ವೆಚ್ಚ ಮಿತಿ ₨ 70 ಲಕ್ಷ:
ಲೋಕಸಭೆ ಚುನಾವಣೆಯಲ್ಲಿ ಸ್ಪರ್ಧಿ­ಸುವ ಅಭ್ಯರ್ಥಿಗಳು ₨70 ಲಕ್ಷ ವರೆಗೆ ಮಾತ್ರ ಖರ್ಚು ಮಾಡುವ ಅವಕಾಶ­ವಿದೆ ಎಂದು ತಿಳಿಸಿದ್ದಾರೆ.

ಅಭ್ಯರ್ಥಿಗಳ ಖರ್ಚು ವೆಚ್ಚದ ಬಗ್ಗೆ ನಿಗಾ ವಹಿಸಬೇಕು. ಸಭೆ, ಸಮಾರಂಭ­ಗಳಿಗೆ ಬಳಸುವ ಸಾಮಗ್ರಿಗಳಿಗೆ ಆಗುವ ಸರಿಯಾಗಿ ವೆಚ್ಚ ಲೆಕ್ಕಾಚಾರ ಮಾಡಿ ವರದಿ ನೀಡಬೇಕು ಎಂದು ಜಾಗೃತ ತಂಡಗಳಿಗೆ ಸೂಚಿಸಲಾಗಿದೆ.

ಬೀದರ್ ಲೋಕಸಭಾ ಕ್ಷೇತ್ರ ಒಟ್ಟು 8 ವಿಧಾನಸಭಾ ಕ್ಷೇತ್ರಗಳು ಒಳ­ಗೊಂಡಿವೆ. ಬೀದರ್‌ ವಿಧಾನಸಭಾ ಕ್ಷೇತ್ರದ ಲೆಕ್ಕಚಾರ ತಂಡ ಬೀದರ್‌ ಸಹಾ­ಯಕ ಆಯುಕ್ತರ ಕಚೇರಿಯಲ್ಲಿ ಹಾಗೂ ಉಳಿದ ಕ್ಷೇತ್ರದ ಲೆಕ್ಕಚಾರ ತಂಡಗಳು ಆಯಾ ತಹಶೀಲ್‌ ಕಚೇರಿಯಲ್ಲಿ ಕಾರ್ಯ ನಿರ್ವಹಿಸಬೇಕು ಎಂದು ತಿಳಿಸಿದ್ದಾರೆ.

ಮತಗಟ್ಟಿಗಳಲ್ಲಿ ಸೌಕರ್ಯಗಳ ಪರಿಶೀಲನೆ: ಕ್ಷೇತ್ರದ ಎಲ್ಲ ಮತಗಟ್ಟಿ­ಗಳಿಗೆ ಭೇಟಿ ನೀಡಿ ನೀರು, ವಿದ್ಯುತ್‌, ಸೇರಿ ಮೂಲಸೌಕರ್ಯ ಇರುವ ಬಗೆಗೆ ಖಚಿತ ಪಡಿಸಿಕೊಳ್ಳಬೇಕು. ಒಂದು ವೇಳೆ ತಪ್ಪಿದ್ದಲ್ಲಿ ಸಿಬ್ಬಂದಿ ವಿರುದ್ಧ ಕ್ರಮ ಕೈಗೊಳ್ಳಲಾಗುವುದು ಎಂದು ಎಚ್ಚರಿಸಿದ್ದಾರೆ