ಬೀದರ್‌ | ರೈತರಿಗೆ ವರವಾದ ನಾಲಾ ಸೇತುವೆ: ಮಳೆ ನೀರಿನಿಂದ ಬೆಳೆಗಳಿಗೆ ರಕ್ಷಣೆ

ಬೀದರ್‌: ತಾಲ್ಲೂಕಿನ ಹೊಕ್ರಾಣ (ಬಿ) ಗ್ರಾಮ ಪಂಚಾಯಿತಿ ವ್ಯಾಪ್ತಿಯಲ್ಲಿ 11 ನಾಲಾ ಸೇತುವೆಗಳನ್ನು ನಿರ್ಮಿಸಲಾಗಿದ್ದು, ಇವುಗಳು ರೈತರಿಗೆ ವರವಾಗಿ ಪರಿಣಮಿಸಿವೆ.

ಪಂಚಾಯಿತಿ ವ್ಯಾಪ್ತಿಯ ಚಿಂತಲಗೀರಾ ಗ್ರಾಮದಲ್ಲಿ ಅತಿ ಹೆಚ್ಚು 8 ನಾಲಾ ಸೇತುವೆಗಳನ್ನು ನಿರ್ಮಿಸಿದರೆ, ಹೊಕ್ರಾಣದಲ್ಲಿ 2 ಹಾಗೂ ಧರ್ಮಾಪೂರದಲ್ಲಿ 1 ಸೇತುವೆ ನಿರ್ಮಿಸಲಾಗಿದೆ.

ಮಹಾತ್ಮ ಗಾಂಧಿ ರಾಷ್ಟ್ರೀಯ ಗ್ರಾಮೀಣ ಉದ್ಯೋಗ ಖಾತ್ರಿ ಯೋಜನೆಯಡಿ ಈ ಕಾಮಗಾರಿ ಪೂರ್ಣಗೊಳಿಸಲಾಗಿದೆ. ಪ್ರತಿಯೊಂದು ನಾಲಾ ಸೇತುವೆ ನಿರ್ಮಾಣಕ್ಕೆ ₹1.50ರಿಂದ ₹2 ಲಕ್ಷ ವೆಚ್ಚ ಮಾಡಲಾಗಿದೆ.

ಏನು ಪ್ರಯೋಜನ?:

ಮಳೆ ಬಂದಾಗ ಎಲ್ಲೆಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ನೀರು ಹರಿದು ಹೋಗುತ್ತದೆಯೋ ಅಂತಹ ಸ್ಥಳಗಳನ್ನು ಗುರುತಿಸಿ, ಅಲ್ಲಿ ಈ ನಾಲಾ ಸೇತುವೆಗಳನ್ನು ನಿರ್ಮಿಸಲಾಗಿದೆ. ಎಷ್ಟೇ ಮಳೆ ಸುರಿದರೂ ನೀರು ಸುಗಮವಾಗಿ ಹರಿದು ಹೋಗುತ್ತದೆ. ಹೊಲಗಳಿಗೆ ಹೋಗುವ ಮಾರ್ಗದ ಬದಿಯಲ್ಲಿ ಕಾಲುವೆ ಮಾದರಿಯಲ್ಲಿ ದೊಡ್ಡದಾಗಿ ಟ್ರೆಂಚ್‌ ನಿರ್ಮಿಸಲಾಗಿದ್ದು, ನೀರು ಅದರ ಮೂಲಕವೇ ಹರಿದು ಹೋಗುವಂತೆ ಮಾಡಲಾಗಿದೆ.

ಈ ಹಿಂದೆ ಮಳೆ ಬಿದ್ದಾಗ ನೀರು ಹೊಲಗಳಿಗೆ ನುಗ್ಗಿ ಬೆಳೆಗಳೆಲ್ಲ ಹಾಳಾಗುತ್ತಿತ್ತು. ಈಗ ಅದು ತಪ್ಪಿದೆ. ನಾಲಾ ಅಡಿಯಿಂದ ನೀರು ಹರಿದು, ನೇರವಾಗಿ ಟ್ರೆಂಚ್‌ ಸೇರಿಕೊಳ್ಳುತ್ತದೆ. ಅಲ್ಲಿಂದ ಹಳ್ಳ, ನದಿಗೆ ಹೋಗಿ ಸೇರಿಕೊಳ್ಳುತ್ತದೆ. ಟ್ರೆಂಚ್‌ ಉದ್ದಕ್ಕೂ ರೈತರು ನಡೆದಾಡಲು, ಅವರ ವಾಹನಗಳು ಚಲಿಸಲು ಕಚ್ಚಾ ರಸ್ತೆ ಕೂಡ ನಿರ್ಮಿಸಲಾಗಿದೆ. ಇನ್ನು, ನಾಲಾ ಸೇತುವೆಗಳ ಮೇಲೆ ಎತ್ತಿನ ಗಾಡಿ, ಸರಕು ಸಾಗಣೆಯ ಎಲ್ಲ ರೀತಿಯ ವಾಹನಗಳು ಸಂಚರಿಸಬಹುದಾಗಿದ್ದು, ಒಂದು ಸಾವಿರ ಎಕರೆಯಲ್ಲಿ ರೈತರು ಬೆಳೆದ  ಎಲ್ಲ ರೀತಿಯ ಉತ್ಪನ್ನಗಳ ಸಾಗಾಣಿಕೆಗೆ ಇದರಿಂದ ಅನುಕೂಲವಾಗಿದೆ.

‘ಈ ಹಿಂದೆ ಮಳೆ ಬಂದಾಗ ಸಾಕಷ್ಟು ಕೆಸರಾಗುತ್ತಿತ್ತು. ಮಳೆ ನೀರು ಬೇಕಾಬಿಟ್ಟಿ ಹರಿದು ಹೊಲಗಳಿಗೆ ನುಗ್ಗಿ ಹಾನಿ ಉಂಟಾಗುತ್ತಿತ್ತು. ನಡೆದಾಡಲು ಕಷ್ಟವಾಗುತ್ತಿತ್ತು. ನಾಲಾ ಸೇತುವೆಗಳ ನಿರ್ಮಾಣದಿಂದ ಅದು ದೂರಾಗಿದೆ’ ಎಂದು ಸ್ಥಳೀಯ ರೈತರಾದ ಬಸವರಾಜ, ಮಹಾದೇವ ತಿಳಿಸಿದ್ದಾರೆ.