ಗುಂಡ್ಲುಪೇಟೆ | ಜೂಜು ಅಡ್ಡೆಯ ಮೇಲೆ ದಾಳಿ: ನಾಲ್ವರ ಬಂಧನ

ಗುಂಡ್ಲುಪೇಟೆ: ಜೂಜಾಟದ ಅಡ್ಡೆಯ ಮೇಲೆ ಪೊಲೀಸರು ದಾಳಿ ನಡೆಸಿ ನಾಲ್ವರನ್ನು ಬಂಧಿಸಿರುವ ಘಟನೆ ತಾಲ್ಲೂಕಿನ ಕುಣಗಳ್ಳಿ ಗ್ರಾಮದಲ್ಲಿ ನಡೆದಿದೆ.

ಕುಣಗಳ್ಳಿ ಗ್ರಾಮದ ಕೊಂಗಳಪ್ಪ (54), ಪ್ರಕಾಶ್ (52), ಕಲ್ಲಿಗೌಡನಹಳ್ಳಿ ಗ್ರಾಮದ ಶಿವಣ್ಣ (42), ಗೋಪಾಲಪುರ ಗ್ರಾಮದ ಮಹೇಶ್ (49) ಬಂಧಿತರು. ಕಳ್ಳೀಪುರ ಹಾಗೂ ಕುಣಗಳ್ಳಿ ಗ್ರಾಮದ ನಡುವಿನ ರಸ್ತೆ ಬದಿಯಲ್ಲಿ ಸುಮಾರು ಐದರಿಂದ ಆರು ಮಂದಿಯ ಗುಂಪು ಅಕ್ರಮವಾಗಿ ಜೂಜಾಟದಲ್ಲಿ ತೊಡಗಿದ್ದ ಖಚಿತ ಮಾಹಿತಿ ಆಧರಿಸಿ ಪೊಲೀಸ್ ಇನ್‌ಸ್ಪೆಕ್ಟರ್‌ ಪರಶಿವಮೂರ್ತಿ ಸೂಚನೆ ಮೇರೆಗೆ ಪೊಲೀಸರು ದಾಳಿ ನಡೆಸಿದ್ದಾರೆ. ಪಣಕ್ಕಿಟ್ಟಿದ್ದ ₹ 15,060 ನಗದು ಮತ್ತು ಎರಡು ಬೈಕ್‍ಗಳನ್ನು ವಶಪಡಿಸಿಕೊಂಡಿದ್ದಾರೆ. ಆರೋಪಿಗಳಾದ ಗೋಪಾಲಪುರ ಗ್ರಾಮದ ಜಿ.ಆರ್.ಸ್ವಾಮಿ, ಕಲ್ಲಿಗೌಡನಹಳ್ಳಿ ಗ್ರಾಮದ ಶ್ರೀನಿವಾಸ ತಲೆ ಮರೆಸಿಕೊಂಡಿದ್ದಾರೆ.

ಕಾರ್ಯಾಚರಣೆಯಲ್ಲಿ ಪಿಎಸ್‍ಐ ಸಾಹೇಬಗೌಡ, ಕಾನ್‌ಸ್ಟೆಬಲ್‌ಗಳಾದ ಚಿನ್ನಸ್ವಾಮಿ, ಮಂಜುನಾಥ್, ಮಹೇಶ್, ಮಹೇಶ್, ಸುನಿಲ್ ಪಾಲ್ಗೊಂಡಿದ್ದರು.