ಚಿನ್ನ ಕಳವು: ಇಬ್ಬರ ಸೆರೆ

ಗೌರಿಬಿದನೂರು: ನಗರದ ಪ್ರಶಾಂತ ನಗರದ ನಿವಾಸಿ ಕೆ.ಎನ್. ಸತೀಶ್ ಅವರ ಮನೆಯಲ್ಲಿ ವರ್ಷದ ಹಿಂದೆ ನಡೆದ ಕಳವು ಪ್ರಕರಣ ಭೇದಿಸುವಲ್ಲಿ ಪೊಲೀಸರು ಯಶಸ್ವಿಯಾಗಿದ್ದು, ಇಬ್ಬರು ಆರೋಪಿಗಳನ್ನು ಬಂಧಿಸಿದ್ದಾರೆ.

ನೆರೆಯ ಹಿಂದೂಪುರ ನಗರದ ಶೇಖ್ ಇಲಿಯಾಜ್(33) ಮತ್ತು ಎಸ್.ನಿಜಾಂ (24) ಬಂಧಿತರು.

ಇವರು ನಗರದ ಪ್ರಶಾಂತ ನಗರದ ಕೆಎಸ್‌ಆರ್‌ಟಿಸಿ ಬಸ್ ಚಾಲಕ ಸತೀಶ್ ಅವರ ಮನೆಯಲ್ಲಿ ಕಳವು ಮಾಡಿದ್ದರು. ಮನೆಯವರು ನೀಡಿದ ದೂರಿನ ಮೇರೆಗೆ ಆರೋಪಿಗಳ ಪತ್ತೆಗೆ ಕಾರ್ಯಾಚರಣೆ ನಡೆಸಿದ್ದ ಪೊಲೀಸರು ಹಿಂದೂಪುರದಲ್ಲಿದ್ದ ಆರೋಪಿಗಳನ್ನು ಬಂಧಿಸಿ ವಿಚಾರಣೆ ನಡೆಸಿದಾಗ ಸುಮಾರು ₹ 2.33 ಲಕ್ಷ ಮೌಲ್ಯದ 83.600 ಗ್ರಾಂ ಚಿನ್ನ ಕದ್ದಿರುವುದಾಗಿ ಒಪ್ಪಿಕೊಂಡಿದ್ದಾರೆ.

ಆರೋಪಿಗಳ ವಿರುದ್ಧ ಪ್ರಕರಣ ದಾಖಲಿಸಿಕೊಂಡು ‌ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗಿದೆ ಎಂದು ಪೊಲೀಸರು ‌ತಿಳಿಸಿದ್ದಾರೆ.