ಸಾತ್ಕೋಳಿ | ಭಾರಿ ಮಳೆ: ಹಳ್ಳದಲ್ಲಿ ಕೊಚ್ಚಿಹೋದ ಹಸು

ಸಾತ್ಕೋಳಿ(ಎನ್.ಆರ್.ಪುರ): ತಾಲ್ಲೂಕಿನ ಮುತ್ತಿನಕೊಪ್ಪ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಸಾತ್ಕೋಳಿಯ ಗ್ರಾಮದ ಹಳ್ಳದಲ್ಲಿ ಬುಧವಾರ ಸಂಜೆ ಭಾರಿ ಮಳೆಗೆ 2 ಹಸುಗಳು ಹಳ್ಳದಲ್ಲಿ ಕೊಚ್ಚಿಕೊಂಡು ಹೋಗಿವೆ.

ಸಾತ್ಕೋಳಿ ಮಾರ್ಗ ಮಧ್ಯೆ ಹಳ್ಳ ಸಿಗುತ್ತದೆ. ಈ ಹಳ್ಳಕ್ಕೆ ಸಣ್ಣ ಪೈಪ್‌ ಹಾಕಿ ಮೋರಿ ನಿರ್ಮಿಸಲಾಗಿದೆ. ಧಾರಾಕಾರ ಮಳೆಯಿಂದ ನೀರು ಉಕ್ಕಿ ರಸ್ತೆಯ ಮೇಲೆ ಹರಿದು, ರಸ್ತೆಯ ಮೇಲಿನಿಂದ ಬರುತ್ತಿದ್ದ ಸಾತ್ಕೋಳಿ ಗ್ರಾಮದ ನಾಗೇಶ ಮತ್ತು ನಾಗರತ್ನಾ ಎಂಬುವರಿಗೆ ಸೇರಿದ ಹಸುಗಳು ನೀರಿನಲ್ಲಿ ತೇಲಿಕೊಂಡು ಹೋಗಿವೆ.

ಇದೇ ಹಳ್ಳದಲ್ಲಿ ಕೆಲವು ವರ್ಷಗಳ ಹಿಂದೆ ಮಳೆಗಾಲದಲ್ಲಿ ಕಾರು ಕೊಚ್ಚಿಕೊಂಡು ಹೋಗಿ ಒಬ್ಬರು ಮೃತ ಪಟ್ಟಿದ್ದರು. ಹಲವು ವರ್ಷಗಳಿಂದ  ಹಳ್ಳಕ್ಕೆ ದೊಡ್ಡ ಸೇತುವೆ ನಿರ್ಮಿಸಿಕೊಡುವಂತೆ ಜನಪ್ರತಿನಿಧಿಗಳು ಹಾಗೂ ಅಧಿಕಾರಿಗಳಿಗೆ ಮನವಿ ಸಲ್ಲಿಸಿದರೂ ಸೇತುವೆ ನಿರ್ಮಾಣವಾಗಿಲ್ಲ ಎಂದು ಗ್ರಾಮಸ್ಥರು ಆರೋಪಿಸಿದರು.

ಅಡಿಕೆ, ಭತ್ತಕ್ಕೆ ಹಾನಿ:

ಮಳೆಯಿಂದಾಗಿ  ಗ್ರಾಮದ ರಾಮಣ್ಣ, ಗಂಗಣ್ಣ, ಪುಟ್ಟಸ್ವಾಮಿ, ಲಿಂಗಣ್ಣ ಮುಂತಾದವರ ಅಡಿಕೆ ತೋಟಕ್ಕೆ ನೀರು ನುಗ್ಗಿದೆ.  ಮಂಜುನಾಥ, ನಾಗರತ್ನಾ, ನಾಗಪ್ಪ, ಕೃಷ್ಣಪ್ಪ ಎಂಬುವರ ಗದ್ದೆಗಳಿಗೆ ಕೆಸರು ನೀರು ನುಗ್ಗಿ ಭತ್ತದ ಪೈರು ಹಾಳಾಗಿದೆ ಎಂದು ಗ್ರಾಮಸ್ಥರು ಹೇಳಿದ್ದಾರೆ.