ಕಡೂರು: ಶಕ್ತಿ ಕಳೆದುಕೊಂಡ ಗ್ರಾಮೀಣ ಶಾಲೆಗಳು

ಕಡೂರು: ಭವಿಷ್ಯದ ಪ್ರಜೆಗಳನ್ನು ರೂಪಿಸುವ ಸರ್ಕಾರಿ ಶಾಲೆಗಳು ಹಲವು ಶೈಕ್ಷಣಿಕ ಸಮಸ್ಯೆಗಳಿಂದ ನಿತ್ರಾಣಗೊಂಡಿವೆ. ದಶಕಗಳಿಂದ ನಡೆಯದ ದುರಸ್ತಿ, ನಿರ್ಮಾಣವಾಗದ ಹೊಸ ಕೊಠಡಿಗಳು, ಕೊಠಡಿಗಳ ಕೊರತೆ, ಸೋರುವ, ಕುಸಿಯುವ ಸ್ಥಿತಿಯಲ್ಲಿರುವ ಕೊಠಡಿಗಳಲ್ಲೇ ಮಕ್ಕಳು ನಲಿಯುತ್ತಲೇ ಕಲಿಯುತ್ತಿದ್ದಾರೆ.

ಸಮಸ್ಯೆಗಳಿಗೆ ಪರಿಹಾರ ಒದಗಿಸಬೇಕಾದ ಆಡಳಿತ ವ್ಯವಸ್ಥೆಯ ಅಸಡ್ಡೆ, ಅನುದಾನದ ಕೊರತೆ ಗ್ರಾಮೀಣ ಭಾಗದಲ್ಲಿರುವ ಶಾಲೆಗಳ ದುಃಸ್ಥಿತಿಗೆ ಕಾರಣವಾಗಿದೆ ಎಂಬುದು ಪೋಷಕರ ದೂರು.

ಕಡೂರು ತಾಲ್ಲೂಕಿನಲ್ಲಿ ಕಡೂರು ಮತ್ತು ಬೀರೂರು ಶೈಕ್ಷಣಿಕ ವಲಯಗಳಿವೆ. ವಲಯ ಎರಡು ಇದ್ದರೂ ಪರಿಸ್ಥಿತಿ ಭಿನ್ನವಾಗಿಲ್ಲ. ಕಡೂರು ವಲಯದಲ್ಲಿ ಗ್ರಾಮೀಣ ಪ್ರದೇಶದ ಶಾಲೆಗಳಲ್ಲಿ ಕೊಠಡಿಯ ಕೊರತೆ, ಹಲವು ಶಾಲೆಗಳಲ್ಲಿ ಸೋರುವ ಕೊಠಡಿಗಳು, ಇನ್ನು ಕೆಲವೆಡೆ ಕುಸಿಯುವ ಸ್ಥಿತಿಯಲ್ಲಿ ಕೊಠಡಿಗಳಿವೆ. ಸೋರುವ ಕೊಠಡಿಯನ್ನು ಕಚೇರಿಯನ್ನಾಗಿಸಿ, ಕಚೇರಿ ಕೋಣೆಗಳಲ್ಲಿ ತರಗತಿ ನಡೆಸಲಾಗುತ್ತಿರುವ ಶಾಲೆಗಳೂ ಇವೆ.

ಬಿಸಿಯೂಟದ ಆಹಾರಧಾನ್ಯ ದಾಸ್ತಾನಿಗೂ ಹಲವು ಶಾಲೆಗಳಲ್ಲಿ ಸಮರ್ಪಕ ವ್ಯವಸ್ಥೆ ಇಲ್ಲ. ಹಲವು ಶಾಲೆಗಳಲ್ಲಿ ದಾಸ್ತಾನು ಕೊಠಡಿಯ ಆಹಾರ ಧಾನ್ಯಗಳ ಚೀಲಗಳ ಪಕ್ಕದಲ್ಲೇ ತರಗತಿ ನಡೆಸುವ ಸ್ಥಿತಿಯೂ ಇದೆ.

ಗ್ರಾಮೀಣ ಪ್ರದೇಶದ ಶಾಲೆಗಳಲ್ಲಿ ಕೊಠಡಿ ಕೊರತೆಯ ಜತೆಗೆ ಮಕ್ಕಳ ಕೊರತೆಯೂ ಇದೆ. ಕಡೂರು ವಲಯದ ಚೌಡ್ಲಾಪುರ ಸರ್ಕಾರಿ ಪ್ರಾಥಮಿಕ ಶಾಲೆಯಲ್ಲಿ 1ರಿಂದ 5ನೇ ತರಗತಿವರೆಗೆ 12 ಮಕ್ಕಳು ವ್ಯಾಸಂಗ ಮಾಡುತ್ತಿದ್ದು, ಇಬ್ಬರು ಶಿಕ್ಷಕರು ಬೋಧಿಸುತ್ತಿದ್ದಾರೆ. ಶಾಲೆಯ ಸೂರು ಕುಸಿಯುತ್ತಿದ್ದು, ಟೀರುಗಳನ್ನು ಗೆದ್ದಲು ತಿನ್ನುತ್ತಿದೆ. ಹೆಂಚು ಕುಸಿದು ಒಂದು ಕೊಠಡಿ ಬಳಕೆಗೆ ಯೋಗ್ಯವಾಗಿಲ್ಲ. ಕೋಣೆ ಇಲ್ಲದ ಕಾರಣ 1ರಿಂದ 3ನೇ ತರಗತಿ ಮಕ್ಕಳಿಗೆ ನಲಿ-ಕಲಿ ಕೊಠಡಿಯಲ್ಲಿ ಹಾಗೂ 4, 5ನೇ ತರಗತಿ ವಿದ್ಯಾರ್ಥಿಗಳಿಗೆ ಒಂದು ಕೋಣೆಯಲ್ಲಿ ಜತೆಯಾಗಿ ಪಾಠ ಕೇಳುತ್ತಿದ್ದಾರೆ.

ಬೀರೂರು ಶೈಕ್ಷಣಿಕ ವಲಯದ ಬ್ಯಾಗಡೆಹಳ್ಳಿಯಲ್ಲಿ 1ರಿಂದ 7ನೇ ತರಗತಿವರೆಗೆ ಶಾಲೆ ನಡೆಯುತ್ತಿದ್ದು, 32 ಮಕ್ಕಳು ಕಲಿಯುತ್ತಿದ್ದಾರೆ. ದಶಕಗಳ ಹಿಂದೆ ನಿರ್ಮಾಣವಾದ ಕೊಠಡಿಗಳು ಸೋರುತ್ತಿವೆ. ಇನ್ನೊಂದು ಕೊಠಡಿ ಸಿಮೆಂಟ್‌ ಶೀಟ್‌ಗಳ ಚಾವಣಿ ಹೊಂದಿದೆ.

‘ಸರ್ಕಾರಿ ಶಾಲೆಗಳಲ್ಲಿ ಕಲಿಕೆ ಉತ್ತಮವಾಗಿಯೇ ಇದೆ. ಆದರೆ, ಮೂಲಸವಲತ್ತುಗಳ ಕೊರತೆಯು ಪೋಷಕರನ್ನು ಆತಂಕಕ್ಕೀಡುಮಾಡುತ್ತಿದೆ. ಈ ಕಾರಣದಿಂದ ಮಕ್ಕಳನ್ನು ಖಾಸಗಿ ಶಾಲೆಗಳ ಸೇರಿಸುತ್ತಿದ್ದಾರೆ. ಸರ್ಕಾರವು ಶಾಲೆಗಳಲ್ಲಿ ಸುಸಜ್ಜಿತ ವ್ಯವಸ್ಥೆ ಕಲ್ಪಿಸಿದರೆ ಪೋಷಕರು ಖಾಸಗಿ ಶಾಲೆಗಳನ್ನು ಅವಲಂಬಿಸಬೇಕಿಲ್ಲ’ ಎನ್ನುತ್ತಾರೆ ಮಲ್ಲೇಶ್ವರ ಗ್ರಾಮಪಂಚಾಯಿತಿ ಸದಸ್ಯ ಶೂದ್ರ ಶ್ರೀನಿವಾಸ.

ಕಲಿಕೆ ದಾಸ್ತಾನು ಒಂದೇ ಕಡೆ

ಕಡೂರು ವಲಯದ ಬಂಟಿಗನಹಳ್ಳಿಯಲ್ಲಿ 1ರಿಂದ 7ನೇ ತರಗತಿವರೆಗೆ 50ಮಕ್ಕಳು ವ್ಯಾಸಂಗ ಮಾಡುತ್ತಿದ್ದು 5 ಕೊಠಡಿಗಳು ಇವೆ. ಕೋಣೆಗಳು ಸೋರುವ ಕುಸಿಯುವ ಭಯದಿಂದ ಕಚೇರಿಯಲ್ಲಿ ಮಕ್ಕಳಿಗೆ ಪಾಠ ಹಾಗೂ ಪಾಠ ಕಲಿಯುವ ಸ್ಥಳದಲ್ಲಿ ಆಹಾರಧಾನ್ಯಗಳ ದಾಸ್ತಾನು ಮಾಡಲಾಗುತ್ತಿದೆ. ಈ ಹಿಂದೆ ನಿರ್ಮಿಸಿದ್ದ ದಾಸ್ತಾನು ಕೊಠಡಿಯ ಗೋಡೆ ಕುಸಿದಿದೆ.

ಅನುದಾನದ ಕೊರತೆಯೂ ಕಾರಣ...

‘ಶಾಲೆಗಳ ಮೂಲಸವಲತ್ತಿನ ದುಃಸ್ಥಿತಿಗೆ ಅನುದಾನದ ಕೊರತೆಯೂ ಕಾರಣವಾಗಿದೆ. ಸದ್ಯ ಜಿಲ್ಲಾ ಮತ್ತು ತಾಲ್ಲೂಕು ಪಂಚಾಯಿತಿಗಳಲ್ಲಿ ಜನಪ್ರತಿನಿಧಿಗಳ ಆಡಳಿತವಿಲ್ಲ. ಜಿಲ್ಲಾ ಪಂಚಾಯಿತಿಯಿಂದ ಅನುದಾನ ಪಡೆದು ದುರಸ್ತಿ ಅಥವಾ ಹೊಸ ಕೊಠಡಿಗಳ ನಿರ್ಮಾಣಕ್ಕೆ ಕ್ರಮವಹಿಸಬಹುದಿತ್ತು. ಶಾಸಕರು ಶಾಲೆಗಳಿಗೆ ಅನುದಾನ ಹಂಚಿಕೆ ಮಾಡುವುದು ಕಷ್ಟ. ಗ್ರಾಮ ಪಂಚಾಯಿತಿಗಳಲ್ಲಿ 15ನೇ ಹಣಕಾಸು ಯೋಜನೆ ಹಾಗೂ ವರ್ಗ-1ರಲ್ಲಿ ಶಾಲೆಗಳ ಅಭಿವೃದ್ಧಿಗೆ ಕ್ರಮವಹಿಸಲು ಅವಕಾಶವಿದೆ. ಆದರೆ ಈ ಬಗ್ಗೆ ಯಾರೂ ಕ್ರಮ ವಹಿಸಲು ಮುಂದಾಗುವುದಿಲ್ಲʼ ಎನ್ನುತ್ತಾರೆ ತಾಲ್ಲೂಕು ಪಂಚಾಯಿತಿ ಮಾಜಿ ಸದಸ್ಯ ಬ್ಯಾಗಡೆಹಳ್ಳಿ ಬಸವರಾಜ್.